د هلمند یو شمېر اوسېدونکي وایي، د خوراکي توکو د بیو لوړېدو د دوی د ورځني ژوند انډول ګډوډ کړی.
د دوی په خبره، اکثریت خلک ورځنۍ مزدوري کوي، خو اوس له یوې خوا ورته کار نه پیدا کېږي او له بلې خوا د خوراکي توکو د بیو لوړېدل ورته د زغم وړ نه دي.
د هلمند اوسېدونکی علي الله وايي: « غوړي او وریجې ډېر ګران شوي. یوه بورۍ وریجې ۳۰۰۰ افغانیو ته رسېدلې دي. له بلې خوا، بېکاري ده، په کار پسې ګرځو، خو څوک مو نه ګوماري.»
د هلمند اوسېدونکی ګلاب وايي: « زموږ منځ کې داسې کسان شته چې د شپې ډوډۍ نه لري. اوړه، غوړي، وريجې او نور توکي ټول قېمته شوي او خلک یې د اخیستلو توان نه لري. زه له ډېرې بېوزلۍ بازار ته پلی ځم راځم.»
په ورته وخت کې د لښکرګاه ښاروالۍ چارواکي وايي، د بازار د څارنې لپاره یې د کنټرول ټیمونه فعاله کړي او هېچا ته اجازه نه ورکوي چې پر خلکو توکي په لوړه بیه وپلوري.
د لښکرګاه ښاروالۍ ویاند محمد طاهر ابشار وايي: « لښګرګاه ښاروالي به د نرخونو د کنټرول لپاره ګامونه پورته کړي او هڅه به وکړي چې ښاریانو ته په سمه بیه توکي چمتو کړي. موږ د نرخونو د کنټرول لپاره له سوداګرو سره هم په خبرو بوخت یو.»
د هلمند د سوداګرۍ خونې چارواکي بیا وایي، هغه توکي چې مخکې له پاکستان څخه واردېدل، اوس یې بیې لوړې شوې دي. د دوی په خبره، سوداګر توانېدلي چې د پاکستان په ځای بدیلې سوداګریزې لارې پیدا کړي او ډېر ژر به له نورو هېوادونو څخه افغانستان ته را وارد شي چې ورسره به بیې هم بېرته راټیټې شي.
د هلمند د سوداګرۍ خونې رییس غلام یحی پښتون وايي: « د پاکستان لارو بندېدو ډېر اغېز په وریجو او غوړیو کړی. زه تاسو ته زېری درکوم چې ډېر ژر به د دغو توکو بیې خپل عادي حالت ته راشي. حکومت او سوداګرو د پاکستان بدیلې لارې پيدا کړې دي او دا ستونزه به هواره شي.»
له پاکستان سره د لارو له بندېدو وروسته، په هلمند کې د وريجو، اوړو او غوړیو په ګډون د یو شمېر خوراکي توکو بیې لوړې شوې دي. یو شمېر خلک وایي، د بیو لوړېدو تر شا د ځینو سوداګرو له لوري احتکار هم مهم لامل دی.
