د لغمان ولایت مرکز مهترلام بابا ښاروالۍ د یوې ولسي غونډې په لړ کې د خپلو عوایدو زیاتېدو خبر ورکوي.
د مهترلام ښاروالۍ چارواکو په دې غونډه کې وویل، د روان کال په لومړیو درېیو ربعو کې یې ۷۶ میلیونه افغانۍ عواید درلودل او غواړي دا عواید د ښار په پنځه ګونو ناحیو کې د ۱۲ پروژو په پلي کولو کې وکاروي.
د دوی په خبره، د پلان له مخې هڅه کوي چې د روان کال تر پایه د خپلو عوایدو کچه ۱۰۳ میلیونو افغانیو ته لوړه کړي.
د مهترلام ښاروال رحمت الله شهامت وايي: « موږ په روان کال کې ۱۲ پروژې لرو چې په ښار کې عملي کېږي. د عوایدو لپاره مو ۱۰۳ میلیونه هدف ټاکلی چې تر اوسه ۷۶ میلیونه عواید راټول شوي، همدارنګه ۵ پروژې د بشپړېدو په حال کې دي او پاتې نورې د تدارکاتو په پړاو کې دي.»
د مهترلام ښاروالۍ له خوا د دغو پروژو د پلي کولو خبره داسې مهال کېږي چې د دې ښار اوسېدونکي بیا په ښار کې موجوده ګڼه ګوڼه، بې نظمي او ورځ تر بلې زیاتېدونکی نفوس د اندېښنې وړ بولي او د همدې لپاره د ښار پراخولو غوښتنه کوي.
د مهترلام اوسېدونکی حفیظ الله وايي: « دلته له ۱.۵ میلیون څخه زیات کسان ژوند کوي، خو سړکونه، پلې لارې او واټونه ټول بند دي او خلک یې له ستونزو سره مخ کړي.»
د مهترلام اوسېدونکی سید رحیم وايي: « زموږ یو شمېر حکومتي ادارې هم باید له ښاري سیمو ووځي او له ښار بهر سلطان غازي دښته ورته ځایونه جوړ شي، ترڅو خلکو ته اسانتیاوې رامنځته شي.»
له بلې خوا، چارواکي بیا وايي د ښاري پراختیا، په ښار کې موجوده بې نظمۍ، ګڼه ګوڼې او د نفوسو د زیاتېدو ستونزو ته په کتو، یو شمېر کاروباري ادارې له ښاره بهر بل مناسب ځای ته لېږدول شوې دي.
دوی وايي، د ښار د موجوده حالت د کنټرول لپاره لا وړاندې عملي ګامونه پورته شوي او دا بهیر لا هم روان دی.
د مهترلام ښاروال رحمت الله شهامت وايي: « د ښار د ګڼه ګوڼې کمولو لپاره مو بارګينونه بهر وایستل؛ اوس لګیا یو د نجارانو لپاره هم له ښار څخه د باندې ترتیب برابروو. ورپسې فلزکاران، بیا مستریان او دغه شان نور کاروباریان له ښار څخه بهر ځایونو ته انتقالوو.»
د لغمان ولایت مرکز مهترلام ښار د پراختیا او د موجوده بې نظمۍ له منځه وړلو غوښتنه داسې مهال کېږي چې اوسمهال په دې ښار کې زیاته بې نظمي د رېکشا چلوونکو او لاس پلورونکو له امله رامنځته شوې.
ځینې کتونکي وايي، که چېرې له پلان سره سم د ښار د پراخولو او د شته ستونزو د حل لپاره اقدامات ونه شي، نو ممکن له دې پلوه د خلکو کړاوونه لا زیات شي.
