د استوګنې هغه ښارګوټی چې له بشپړېدو سره به یې پراختیايي چارې منظمې، ښاري ژوند او نورو برخو کې به اسانتیاوې رامنځته شي.
د نوي ښارګوټي د پروژې چارواکي وايي، یوازې د نوي ښار قراردادي شرکت د سړک جوړولو، برېښنا شبکې غځولو او په نورو عامه خدماتو کې شاوخوا ۲۰۰ میلیونه افغانۍ لګولې دي.
د دوی په وینا، د خلکو له لوري د ځمکو اخیستلو او د استوګنې لپاره د ودانیو جوړولو په برخه کې هم شاوخوا یو نیم میلیارده افغانۍ پانګونه شوې چې د ښارګوټي په اقتصادي ودې هم مثبت اغېز پرې باسي.
د مزارشريف نوي ښار پروژې ساحوي مسوول ميرزا ابراهیم زاده وايي: « د خلکو له خوا په دوو برخو کې پانګونه شوې. یو د ځمکې اخیستلو په برخه کې. باید ووایم چې په دې برخه کې یو میلیارد افغانۍ د خلکو له خوا ځمکه اخیستل شوې. دویم د ودانیو جوړولو په برخه د خلکو پانګونه ده. په دې برخه کې هم خلکو شاوخوا ۵۰۰ میلیونه افغانۍ پانګونه کړې او ډېرې ښې ودانۍ جوړې شوې دي.»
د اقتصادي چارو ماهرین هم دا باور څرګندوي چې د نوي ښارګوټي په څېر پراختیايي پروژې کولی شي د سیمې اقتصادي وده کې مرسته وکړي او مزارشریف په یوه عصري او معیاري ښار بدل کړي.
دوی زیاتوي، په بنسټیزو پروژو کې پانګونه نه یوازې د منظم ښاري جوړښت رامنځته کولو لامل ګرځي بلکې خلکو ته د اسانتیاوو برابرولو لامل هم کېږي.
د اقتصادي چارو شنونکی امیدالله قاسم زی وايي: « په هره اندازه چې پراختیايي پروژې ډېرې پلې شي، په هماغه اندازه په ټولنه کې اسانتیاوې رامنځته کېږي. همدارنګه خلکو ته کاري فرصتونه برابرېږي او ترڅنګ یې نورو پروژو او پانګونو ته د پلي کېدو زمینه برابرېږي.»
د اقتصادي چارو شنونکی عبدالظهور مدبر وايي: « افغانستان تازه حرکت پيل کړی او هره هڅه کولی شي ګټه ور ورسوي. پر پراختیايي او زېربنايي پروژو کار کولی شي په اوږدمهاله کې د افغانستان اقتصاد ته ګټه ورسوي.»
په همدې حال کې د بلخ ولایت د سوداګرۍ او پانګونې خونې چارواکي وايي، په وروستیو کې کورنیو او بهرنیو پانګوالو له خوا په دې ولایت کې د پانګونې لپاره لېوالتیا زیاته شوې.
د یادې خونې مرستیال هارون رشید زیاتوي، له بهر څخه د پانګونې جذبولو په موخه يې ځینو هېوادونو ته سفرونه کړي او یو شمېر افغان پانګوال یې هڅولي چې په کور دننه پانګونه وکړي.
دوی زیاتوي، وروستیو کې ځينې پانګوالو بلخ کې د پنځو تولیدي فابریکو جوړولو ژمنه کړې چې نږدې راتلونکي کې به يې چارې پیل شي.
د بلخ سوداګرۍ او پانګونې خونې مرستیال هارون رشید قاضي وايي: « روان کال د بلخ ولایت کې په پانګونه کې ډېر لوی توپير راغلی. ډېری نوي پانګوال چې هغوی یا مهاجر وو یا یې هم په نورو هېوادونو کې پانګونې لرلې، اوس بېرته افغانستان ته راستانه شوي. موږ په نږدې راتلونکي کې ترکیې او ایران هېوادونو سفرونه لرو او په ترڅ کې به یې هغه افغان پانګوال افغانستان ته را دعوت کړو چې هلته یې پانګونه کړې، ترڅو راشي او خپل هېواد کې پانګونه وکړي.»
د ورکړل شویو معلوماتو له مخې، ټاکل شوې همدا روانه میاشت ځینې افغان پانګوال د یوه سهامي شرکت جوړولو له لارې په مزارشریف ښار کې پنځوس میلیونه امریکايي ډالر پانګونه وکړي.
سرچینې وایي، دغه پانګونه به د ټرانسپورټي وسایلو لپاره د څلورو معیاري ټرمینلونو په جوړولو، د کرنیزو توکو او تازه مېوو ساتنې، راکړې ورکړې لپاره د یو مارکېټ او سړو خونو جوړولو، له کرنیزو توکو د درملو لپاره د خامو موادو چمتو کولو، د یوه صنعتي ښارګوټي رامنځته کولو او د انرژۍ د تولید په برخو کې ولګول شي.
