د ننګرهار په دره نور ولسوالۍ کې د وروستیو زلزلو له امله ۱ زر ۱۴۰ زیانمنو شویو کورنیو سره د ترکیې د سرې میاشتې له خوا د خوراکي او غیر خوراکي توکو مرستې د ننګرهار سرې میاشتې ټولنې په تخنیکي همکارۍ ووېشل شوې. د مسوولینو د معلوماتو له مخې، هرې کورنۍ ته د ۱۳ زره افغانیو په ارزښت خوراکي توکي ورکړل شول چې ټول لګښت یې نږدې ۱۵ میلیونه افغانۍ کېږي.
د ننګرهار سرې میاشتې ټولنې رییس مولوي فضل الرحمن فیاض وايي: « په شوکیالۍ، مېچ ګنډول،سوتن، اوتران، لمټک او چوال هغه کلي دي چې په تېرې زلزلې کې سخت ځپل شوي. دوی ته د دوست ترکیې هېواد د سرې میاشتې له خوا د افغانستان د سرې میاشتې ټولنې په همکارۍ، مرستې ووېشل شوې.»
د ترکیې د سرې میاشتې ټولنې استازو د دغو مرستو د وېش پر مهال ویلي، وېشل شویو مرستو کې اوړه، غوړي او د نورو خوراکي توکي او دغه راز روغتیايي کېټونه شامل دي.
د ترکیې د سرې میاشتې ټولنې استازی غزني ګل منګل وايي: « په خوراکي توکو کې اوړه، غوړي، لوبیا، وریجې، مالګه، بوره او نور توکي شامل دي. د روغتیا ساتنې په کېټونو کې د جامو وینځلو صابون، د ځان وینځلو صابون، د غاښونو کریم او برسونه، سطل او نور توکي شامل دي.»
په همدې حال کې، د زلزلې له امله زیانمنې شوې کورنۍ وايي، په شویو مرستو یې یوه اندازه لاسنیوی کېږي، خو ټینګار کوي چې لاهم د دوی د سرپناه ستونزې حل لپاره عملي ګامونه نه دي پورته شوي. دوی په دې برخه کې د مسوولینو د ځانګړي پاملرنې غوښتنه کوي.
د زلزلو له امله زیانمن شوی غازی خان وايي: « د خلکو کورونه، لارې، ویالې او هرڅه وران شوي او موږ غواړو دا ځایونه راجوړ کړي، دا مرستې کفایت نه کوي.
زیانمن شوی جان محمد وايي: « له نورو موسسو غوښتنه کوم چې زموږ کورونه راته جوړ کړي، موږ سرپناه نه لرو.»
زلزله ځپلي دره نور کې د سرپناه ستونزې د حل په برخه کې د عملي اقداماتو غوښتنه داسې مهال کوي چې د دې ولسوالۍ د اوسېدونکو په خبره، اوس دوی تر خېمو لاندې ژوند کوي او د هوا په سړېدو سره یې ژوند ډېر ستونزمن شوی.
