چین کې د افغانستان په اړه ناسته جوړېږي

د پاکستان بهرنیو چارو وزیر شاه محمود قریشي ویلي، راتلونکي میاشت د افغانستان شپږ ګاونډي هېوادونه په چین کې سره کیني او په افغانستان کې د وروستي اقتصادي او بشري وضعیت په اړه خبرې کوي.

قریشي زیاته کړې، په دې ناسته کې ایران، ترکمنستان، ازبکستان، تاجکستان، چین او پاکستان ګډون کوي.

د راپورونو له مخې،په دې ناسته کې افغان لوري ته هم د ګډون بلنه ورکول کېږي او ښايي د اسلامي امارت یو پلاوی په دې ناسته کې ګډون وکړي.

شاه محمود قریشي ویلي، د افغانستان په تړاو د چین ناستې په څنډه کې به د افغانستان،پاکستان او چین درې اړخیزه ناسته هم وشي او په هغه کې به په سیمه ییزو پروژو کې د افغانستان پر ګډون خبرې وشي.