د لرګیو ګنج سیمه د کندهار ښار یو له پخوانیو بازارونو دی. دلته لسګونه نجاران د لرګیو څخه بېلابېل توکي جوړوي، خو اوس په کې د صندلیو جوړول او پلورل ډېر تر سترګو کېږي.
صندلي د کندهار خلکو لپاره د ځان تودولو مشهوره او دودیزه وسیله ده چې د ژمي په موسم کې ترې ګټه اخلي.
صندلي څلور پښې لرونکی مېز دی چې پنډه نغاړکۍ یا بړستن پرې اچول کیږي او ترې لاندې سکاره او یا هم د ګاز کوچنی بخارۍ پرته وي او شاوخوا ترې د کورنۍ غړي راټول وي.
په کندهار کې صندلي جوړونکي وايي، صندلۍ جوړول يې له مهمو تولیداتوڅخه دي او اوسمهال یې بازار ښه تود دی.
د دوی په خبره، صندلۍ د بخارۍ په پرتله کم مصرف لري او اوس يې له ښار سربېره د ولسوالیو اوسېدونکي هم کاروي.
ترکاڼ ضمیراحمد وايي: « صندلۍ ډېره اسانه جوړېږي او په ژمي کې ترې ډېر خلک کار اخلي. دا وسیله د هغو کسانو لپاره غوره ده چې اقتصادي وضعیت یې ښه نه دی.»
ترکاڼ عبدالطیف وايي: « په لاس جوړې شوې او ماشیني جوړې شوې صندلۍ جلا بيې لري. اوس یې بازار ډېر ښه دی، ان له ولسوالیو هم خلک راځي او وړي یې.»
اوس مهال کندهار کې دوه ډوله د لاس او ماشین په وسیله جوړې شوې صندلۍ شته دي.
د کندهار اوسېدونکي وايي، زیات خلک د اقتصادي ستونزو له امله صندلۍ کاروي؛ ځکه ګازي او د لرګیو بخارۍ زیات مصرف کوي او په اوسنیو شرایطو کې د خلک تر وس لوړ دي.
د دوی په خبره، همداراز صندلۍ کې کولی شي د ژمي اوږدې شپې د کورنۍ غړي سره راټول او کورنیو کې یووالی زیات کړي.
د کندهار اوسېدونکی حاجي حمید ګل وايي: « اوس په کې خلک ګاز استفاده کوي. په یوه اوونۍ کې یو تر یونیم کیلو ګاز مصرفوي. نو ویلی شو چې اقتصادي تمامېږي. بله دا ده چې د کورنۍ غړي پرې راټولېږي او بنډار کوي.»
د کندهار اوسېدونکی امیر محمد وايي: « صندلۍ داسې شی دی چې په لږو سکرو ډېره تودوخه کوي. هغوی چې د انګارۍ وس نه لري، صندلۍ ورته ډېر ښه شی دی.»
که څه هم د کندهار هوا معتدله ده، خو ژمی یې خورا سوړ او سخت وي او له همدې امله اوسېدونکي یې د کمزوري اقتصاد او سون توکو بیو لوړوالي له امله صندلۍ څخه ګټه اخلي.
