سږکال د ســـــرپل ولایت له کــــــرنیزو ځمکو د پیازو ښــــــه حاصل راټول شوی. دا هغه محصولات دي چې له دې وړاندې بهرنیو هېوادونو ته صادرېدل او په ښه بیه خرڅېدل.
د دې ولایت یو شمېر بزګران شمشاد ټلویزیون ته وايي، اوس یې د پیازو دا حاصلات د سړو خونو د نه شتوالي له کبله په خلاص میدان پراته دي چې د هرې ورځې په تېرېدو سره خرابیږي.
د دوی په خبره، تېر کال یې ۱۴ کیلو پیاز په ۱۰۰ افغانیو پلورل کېدل، خو سږ کال یې بیه ۲۲ افغانیو ته راټیټه شوې او دا بیه یوازې د دوی لګښتونه هم نه شي پوره کولی.
بزګر رحیم الدین وايي: « حاصلات ښه ډېر شوي، خو بیه نه لري، یو من په ۲۲ تر ۲۵ افغانیو پلورل کېږي. ټولو بزګرانو حاصلات راټول کړي، خو همداسې پراته دي.»
بزګر خیرالدین وايي: « تېره ورځ مې یو موټر بار کړل، من په ۲۵ افغانۍ؛ په دې بیه ما ته هېڅ نه پاتې کېږي. غوښتنه کوو چې محصولاتو ته بازار، سړې خونې یا مارکېټ پیدا شي. داسې چې د دې کروندګرو زحمت ضایع نه شي.»
بزګر شاه محمد وايي: « اته نهه جریبه ځمکه مې پیاز کرلي، حاصل مې راټول کړی، خو اوس بازار نه لري. حتا دومره نه کېږي چې د کارګرانو اجوره خلاصه کړم. حیران پاتې یم څه وکړم!؟. له دولت غوښتنه لرم چې د دې پلورلو کې راسره مرسته وکړي.»
ځینې نور بزګران بیا وايي، له پیازو سربېره د دوی نور کرنیز حاصلات هم له ورته برخلیک سره مخامخ دي. د دوی دا حاصلات نه یوازې بازار نه لري بلکې د حاصلاتو د خوندي ساتلو لپاره سړې خونې هم په واک کې نه لري.
دوی له حکومت غوښتنه وکړه چې د پاکستان د بدیلو لارو موندلو ترڅنګ د دوی د کرنیزو محصولاتو ته د صادرولو په برخه کې هم قراردادونه وکړي.
کروندګر سلیم وايي: « لګښتونه مو کړي، خو اوس خپل لګښت نه پوره کوي. تېر کال بیا هم ښه وو بیه یې لرله، خو سږ کال یې څوک په ۲۰ افغانۍ هم نه اخلي. له دولت هیله لرو چې موږ ته سړې خونې جوړې کړي او محصولاتو ته بازار پيدا کړي.»
کروندګر محمد نظر وايي: « اوس هم وخت شته، له دولت غوښتنه لرو چې له کوم هېواد سره قرارداد وکړي او دا راته خرڅ کړي. حتمي نه ده چې پاکستان ته لاړ شي، که پاکستان نه وي، نورو هېوادونو ته دې واستول شي. دولت باید زموږ د محصولاتو پوښتنه وکړي.»
په ورته وخت کې د سرپل ولایت ځايي چارواکي هم د بزګرانو زیار او لوړو لګښتونو ته په اشارې د پیازو د بازار د اوسني حالت په اړه اندېښنه څرګندوي.
د دوی په خبره، د بزګرانو همدغو ستونزو ته په کتو له جګ پوړو چارواکو سره غږېدلي، ترڅو په دې ولایت کې د کرنې سکټور د ودې او ملاتړ لپاره د یوې معیاري سړې خونې د جوړولو ډاډ ورکړل شوی.
د سرپل ولایت کرنې اوبو لګولو رییس عبدالقادر وحدت وايي: « څو ځله مرکزي حکومت ته وړاندیز شوی چې سرپل ولایت کې سړې خونې جوړې کړي. په دې وروستیو کې د شیخ صاحب له خوا امر شوی چې په سرپل کې د ۱۵۰۰ مټریک ټنو په ظرفیت سره یوه سړه خونه جوړه شي. د دې خونې د جوړولو لپاره ځای انتخاب شوی، نقشه یې جوړه شوې او تمه کېږي چې په ۱۴۰۵ لمریز کال جوړه شي.»
دا یوازې د سرپل ولایت بزګران نه دي چې د کرنې په برخه کې زیات زیار باسي، ترڅو ښه حاصل ترلاسه کړي بلکې په اکثریت ولایتونو کې بزګران د حاصلاتو راټولولو په برخه کې زیاته خواري کوي، خو کله چې د حاصل ټولولو وخت رانږدې شي، په بازارونو کې د یادو حاصلاتو بیې هم راټیټې شي.
د دوی په خبره، د سړو خونو نه شتوالی د دوی بله جدي ستونزه ده چې د کرنیزو توکو بیې یې راټیټې کړې او نه شي کولی حتی خپل لګښتونه هم بېرته ترلاسه کړي.
