د افغانستان اسلامي امارت بهرنیو چارو وزارت سرپرست امیر خان متقي د سه شنبې پر ورځ د « ۱۴۰۰ کال د کب پر ۳مه» کابل کې د یوناما له مشرې دیبورا لاینز سره کتنه وکړه.
په دې کتنه دواړو لوریو د افغانستان په اقتصادي او بشري وضعیت، وروستیو مثبتو بدلونونو، بانکي سکتور، د نوي حکومت په لاسته راوړنو او بشري مرستو خبرې وکړې.
لاینز ویلي،د تېر پرتله د افغانستان وضعیت ښه شوی او په بېلابېلو برخو کې له نوي حکومت سره همغږي زیاته شوې ده.
د بهرنیو چارو سرپرست وزیر امیر خان متقي هیله ښودلې،چې د نوي حکومت د پلانونو په پلي کیدو سره به د هېواد هر اړخیز وضعیت ښه او د ولس اړتیاوې به پوره شي.
متقي ویلي،افغانستان ته د وارداتو کچه لوړه ده او پر افغانستان د لګېدلو بندیزونو زیان د حکومت پر ځای عام ولس ته رسیږي،چې په اسانۍ له نورو هېوادونو سره راکړه ورکړه نه شي کولای.
دغه رارز متقي د ملګرو ملتونو د هغه اندېښنو په تړاو چې ګنې په افغانستان کې د وسله والو ډلو ګواښ په زیاتېدو دی ویلي، دا اندېښنې بې ځایه دي او د افغانستان حکومت هېچ چاته اجازه نه ورکوي،چې افغان خاوره د چا پر ضد وکارول شي.
