Skip to content
په سوېل پکتیا ولایت کې د ملګرو ملتونو د ماشومانو ملاتړ صندوق یا یونیسف استازی بسم الله خوشال وايي،په دغه ولایت ۳۰ سلنه وګړي هېڅ ډول روغتیایي چوپړتیاوو ته لاسرسی نه لري.
خوشال وايي،دغه وګړي،چې شمېر یې ۸۰ زرو ته رسېږي،د پکتیا پنځو ولسوالیو کې ژوند کوي او تیرو ۲۰ کلونو کې ورته هېڅ ډول چوپړتیاوې نه دي وړاندې شوي.
خوشال زیاته کړه:« له ۲۰ تر ۳۰ سلنه دغه وګړي موږ ورته سپینه ساحه وایو،دې کې ژوند کوي،چې شمیر یې تر ۸۰ زره رسیږي او تیرو ۲۰ کلونو کې ورته هېڅ ډول روغتیایي چوپړتیاوې نه دي وړاندې شوي.»
د پکتیا عامې روغتیا ریاست مرستیال بخت محمد پاڅون وايي، د څمکنیو ، پټان ، میرزاکې ، ګرده څېړۍ او وزې ځدراڼ ولسوالیو کې د دغه سیمو د اوسیدونکو لپاره د روغتیاپالانو پنځه ګرځنده ټیمونه فعال شول او بېلابېلو برخو کې به خلکو ته چوپړتیاوې وړاندې کوي.
پاڅون زیاته کړه:« پنځه ګرځنده ټیمونه مو د هغو سیمو لپاره وګومارل، وزې ځدراڼ، پټان،میرزاکې، څمکنیو او ګرده څیړۍ ولسوالیو کې به خلکو ته روغتیایي چوپړتیاوې وړاندې کوي.»
اخوا د ګرځنده روغتیایي ټیمونو کارکوونکي بیا وايي، په خپله خوښه دندو ته حاضر شوي او لیرې پرتو سیمو کې به خلکو ته د روغتیایي چوپړتیاوو وړاندې کولو لپاره چمتو دي.
پکتیا کې د ګرځنده روغتیایي ټیم یوه غړې وايي:« موږ د چوپړتیاوو وړاندې کولو لپاره ګومارل شوي یو. هغه د لیرې سېمو خلک روعتیایي مرکزونو ته لاسرسی نه لري. موږ به هڅه وکړو،چې د مور ماشوم د مړینې کچې راټیټه کړو.»
پکتیا کې د ګرځنده روغتیایي ټیم یوه غړې وايي:«خلکو ته ډاډ ورکوو،چې دوی ته به په سم ډول چوپړتیاوې وړاندې کوو ، ځکه تر اوسه پورې ورته هېڅ ډول چوپړ نه دی وړاندې شوی.»
د عامې روغتیا ریاست مسوولین وایي،په ټولییز ډول د ولایت پر کچه د روغتیاپالانو د معاشونو ستونزې د هواري په هڅه کې دي او تر اوسه پورې یې ګڼو روغتیایي مرکزونو ته بودیجه موندلې ده.
