Skip to content
په داسې حال کې چې د افغانستان درې نیم میلیارده ډالرو کنګل شوې شتمنۍ په تړاو د امریکا ولسمشر جو بایډن پریکړې پراخ کورني او نړیوال اعتراضونه راپورته کړي، نړېوال بانک تازه پریکړه کړې،چې د افغانستان له کنګل شویو پیسو به یو میلیارد ډالر خلاصوي او افغانستان کې به یې د بشري ناورین خطرونو په راکمولو لګوي.
رویټرز داسې پټو پاڼو ته لاسرسی موندلی دی،چې له مخې یې نړیوال بانک غواړي، د افغانستان بیارغونې له صندوقه یادې پیسې دلته پر ښوونیز، روغتیايي،کرنیز سکتور او نورو کورنیو پلانونو ولګوي.
د نړیوال بانک پاڼې یوه برخه:« د دې پیسو له خلاصولو موخه دا ده،چې له اړمنو افغانانو سره مرسته وشي. له دې پریکړې بله موخه دا هم ده،چې په افغانستان کې کلیدي اقتصادي او ټولنیز بنسټونه فعال وساتل شي او راتلونکې کې بشري مرستو ته اړتیا راکمه کړي. موږ غواړو، دا پیسې د خوړو خوندیتوب، روغتیا او پوهنې برخه کې ولګول شي.»
د نړېوال بانک په دې پاڼو کې همداراز ویل شوي،چې دا پیسې به د اسلامي امارت پر ځای د ملګرو ملتونو مرستندویه ادارو ته ورکول کیږي.
یاد بانک کې سرچینو رویټرز ته ویلي،د افغانستان د دې یو میلیارد ډالرو په تړاو به وروستی پریکړه د نړیوال بانک بورډ لخوا راتلونکې مارچ میاشت کې ترسره کیږي.
د نړېوال بانک پاڼې یوه برخه:« پلان دا دی،چې د افغانستان بیارغونې له صندوقه څه باندې یو میلیارد ډالر په ۲۰۲۲ کال کې ولګول شي. د بشري مرستو لپاره به د ۶۰۰ میلیونه ډالرو کڅوړې لګول کیږي او پاتې نورې به په همدې کال کې لومړیتوبونو ته په کتو ولګول شي.»
نړېوال بانک وروسته له هغې دا پریکړه کوي،چې له دې مخکې یې ۲۸۰ میلیونه ډالر له همدې صندوقه د خوړو نړیوال پروګرام او یونیسف ته ورکړي او په وینا یې چې په بریالۍ توګه په افغانستان کې ولګول شول.
د افغانستان بیارغونې صندوق په ۲۰۰۲ کال کې پرانیستل شو،چې دمګړی د نړیوال بانک له خوا مدیریت کیږي او نړیوال مرستندویه هېوادونه په کې د افغانستان بیارغونې لپاره تر خپل توان پورې مرسته کوي.
د یادونې ده،چې دا پیسې د افغانستان خپله شتمني نه بلکې د مرستندویه هېوادونو له خوا افغانستان ته ځانګړې شوې پیسې دي.
