د سیاسي چارو یو شمېر کارپوهان وايي،اسلامي امارت دې جلاوطنه افغان سیاسیونو او پخوانیو چارواکو ته د بېرته را ستنېدو زمینه برابره کړي او په دې برخه کې دې په داسې پروسیجر کار وکړي،چې دغه پخواني سیاسیون د عادي افغانانو په څير ژوند پیل کړي.
دوی وايي، پخوانیو سیاسیونو ستر فرصتونه له لاسه ورکړي او په تیرو شلو کلونو کې افغانستان ته له راغلو امکاناتو یې شخصي استفادې کړي دي.
د سیاسي چارو کارپوه عزیز معارج وايي:« د جمهوریت وخت چارواکو چې اوس تښتیدلي دي،دا هغه څیرې دي،چې دوی زیات فرصتونه له لاسه ورکړي دي او افغانستان ته راغلي امکانات یې مدیریت ونه شو کړی. طالبان باید داسې یوسیستم برابر کړي،چې دغه تښتیدلي سیاسیون بېرته هیواد ته راشي،خو واک دې شریک نه کړای شي.»
یو شمېر نور بیا وايي، مخکې له دې چې دغه سیاسیون هېواد ته راستانه شي،یو ځل دې په خپلو کړنو کتنه وکړي او په هغې انګیزه او فکر دې وطن ته نه راځي،چې د واک جزیرې به جوړې کړي.
دوی وايي دغه تښتیدلي پخواني سیاسیون اوس د افغان ولس او نړیوالې ټولنې له خولې او سترګو پرېوتي دي او د دوی په راتګ سره د واک توازن هم نه شي جوړېدلی.
د سیاسي چارو کارپوه طارق فرهادي وايي:« افغان سیاسیون مخکې له دې چې بېرته راشي په اینه کې دې ځان وګوري،چې ایا د خلکو له سترګو لوېدلي دي او که اوس یې هم هرکلی کېږي؟ دا پوښتنه دې له ځانه وکړي،نور دې په دې فکر کې نه وي،چې په افغانستان کې دې د قدرت جزیرې جوړې کړي او د دغو سیاسیونو راتګ په افغانستان کې د قدرت توازن مسله نه شي حل کولی. حقیت دا دی،چې دوی د نړیوالې ټولنې له سترګو هم لوېدلي دي.»
که څه هم محمد اشرف غني د بېرته راتګ مسله د اسلامي امارت له لوري نه ده تائید شوې، خو د مخکیني ولسمشر ورور حشمت غني احمدزي له دویچه ویلې سره په تازه خبرو کې ویلي، مخکنی ولسمشر خپل هېواد ته د بېرته ستنېدو ته د اغېزمن تمامېدو په شرط لیواله دی، خو له بیاځلي سیاست سره هېڅ ډول علاقه نه لري.
احمدزي زیاته کړې:« یو ځل وګورو،که موثر تمامیږي،ولسمشرحاضر دی،چې افغانستان ته بېرته راوګرځي او په فعلي حالت کې ځینې داسې سوالونه شته دی،چې مخکې له دې داسې یو تصمیم ونیول شي،باید هغه سوالونه حل شي. هغه له وړاندې ویلي، په اخري عمر کې افغانستان کې ووسي او وشي کولای،چې خیر ورسوي او هغه عادي افغان کیدای نه شي،ځکه د افغانستان مخکینی ولسمشر نړیوال او سیمه ییز ارتباطات لري او کیدای شي چې په اقتصادي برخو کې موثر تمام شي، خو دا خبره یې واضع ده،چې بیاځلي سیاست ته د راتګ لپاره علاقه نه لري.»
له دې وړاندې پخواني ولسمشر حامدکرزي او د سولې شورا د پخواني مشر عبدالله عبدالله له لوري له اسلامي امارته غوښتل شوي ول،چې ټولو هغو پخوانيو سیاسیونو ته چې له هېواده بهر دي،د بېرته راتګ زمینه برابره کړي.
په دې برخه کې بیا د اسلامي امارت موقف دادی،چې افغانستان د ټولو افغانانو کور دی او هغه افغانان چې له هېواده بهر دي،که عادي افغانان دي او یا هم سیاسیون کولای،چې بېرته خپل هېواد ته راستانه شي او ارام ژوند ولري.
