د امریکا متحده ایالتو مرکزي قوماندانۍ مشر جنرال کېنټ فرانک مکنزي په یوه مرکه کې ویلي، داعش یا د اسلامي دولت نومې وسله واله ډله په افغانستان کې د ودې په حال کې ده.
مکنزي ویلي،اسلامي امارت د داعش ډلې خلاف دي،خو بیا هم دوی اندېښنه لري چې دا ډله له افغانستانه بهر د فعالیتونو او بریدونو لپاره لېواله ده.
مک کنزي زیاته کړې، په غیر حکومتي او هغه سیمو کې چې د حکومت تر واک لاندې نه دي،داعش په کې وده کړې او دا یو ګواښ دی.
تر دې وړاندې د امریکا د دفاع وزارت یا پنټاګون هم په دې اړه اندېښنه ښودلې وه او چارواکو یې ټینګار کړی و،چې افغانستان کې د داعش یا اسلامي دولت نومې وسله والې ډله له افغانستان سربېره د سیمې او نړۍ لپاره پر ستر ګواښ بدلېدی شي .
خو اسلامي امارت د امریکا متحده ایالتو مرکزي قوماندانۍ د مشر دا خبرې ردوي او وایي،هېڅ وسله والې ډلې ته به په افغانستان کې د فعالیت او پیاوړي کېدو اجازه ورنه کړل شي.
