په هرات کې یو شمېر کورني بې ځایه شوي او له ګاونډیو هېوادونو څخه راستانه شوي کډوال وايي، د ژمي سړې هوا یې ستونزې څو برابره زیاتې کړې دي.
د دوی په خبره، اکثریت کورنۍ د ژمي په دې سړې هوا کې تر خېمو لاندې او نیمه ویجاړو ودانیو کې ژوند کوي.
دوی زیاتوي، د مناسبې سرپناه نه لرلو ترڅنګ، د خوراکي او سون توکوکمښت او همدا راز د تودو جامو نه لرل یې د سړې هوا په وړاندې مقاومت خورا کمزوری کړی.
داخلي بې ځایه شوی الله داد وايي: « ژمۍ را رسېدلی، ساړه او بارانونه دي او دا کورونه په ژمي کې د اوسېدلو نه دي. د دې کورونو دېوالونه نړېدلي او چتونه یې څاڅي. داسې کورونه هم شته چې نه د سون څه لري او نه د خوراک.»
داخلي بې ځایه شوی غلام فاروق وايي: « د واورو او باران په پيل کېدو سره زموږ کوټې هم له اوبو ډکې دي، ښځې او ماشومان په سړه هوا کې د باندې ناستې دي. دا مو حال دی.»
دا کورني بې ځایه شوي او له ګاونډیو هېوادونو راستانه شوي کډوال له اړوند ادارو غواړي چې د سرپناه او روزګار زمینه دې ورته برابره کړي.
له پاکستان څخه راستون شوی انار ګل وايي: « تاسو کولی شی وګورئ، زموږ ماشومان په اوبو کې پراته دي. له بلې خوا، بوټي هم نه شته چې کوټې پرې تودې کړو او سرپناه چېرې چې په وچه کې کېنو. حالات دا ډول دي.»
له پاکستان څخه راستون شوی جمعه ګل وايي: « زه د بالامرغاب ولسوالۍ اوسېدونکی. څو کاله مې پاکستان کې ژوند وکړ او اوس بېرته راغلی یم. په دې کنډوالو کې پراته یو، نه د چت پټولو څه لرو او نه هم د ځان پټولو.»
د هرات ځايي چارواکي که څه هم د بې ځایه شویو او کډوالو ستونزې مني خو وايي، هڅه کېږي دغه کډوال خپلو اصلي سیمو ته ولېږدول شي او هلته ورته د کار کولو زمینه هم برابره شي.
د هرات والي ویاند محمد یوسف سعیدي وايي: « د هرات محلي ادارې د خلکو لپاره د کاري فرصتونو برابرولو او معیشت ښه کولو لپاره هر اړخیز ګامونه اخیستي. په هرات کې د سترو پروژو او دغه راز صنعتي پارکونو له لارې ګڼو خلکو ته د کار زمینې برابرې شوې دي. همدارنګه هڅې روانې دي چې په دې ولایت کې لا ډېر خلک په کار وګومارل شي.»
په هرات کې دا بې ځایه شوې کورنۍ او راستانه شوي کډوال د ژمي له سړې هوا د موجوده ستونزو شکایت داسې مهال کوي چې له ګاونډیو هېوادونو او په تېره بیا له ایران او پاکستان څخه د کډوالو د ایستلو لړۍ لا هم روانه ده او پاکستان په دې برخه کې ټول انساني او نړیوال منل شوي اصول تر پښو لاندې کړي.
له ایران څخه هم په تېرو شپږو میاشتو کې ۱.۲ میلیونه کډوال هېواد ته راستانه شوي دي.
