اروپايي ټولنه وايي په افغانستان کې له یوویشت میلیونه زیات خلک د څښاک پاکو اوبو ته لاسرسی نلري.
تر ځمکې لاندې اوبو زیرمو کمښت او د څښاک پاکو اوبو ته نه لاسرسی هغه ننګونې دي چې د افغان حکومت سربېره د نړیوالو سازمانونو اندیښنې یی هم راپارولي دي.
اروپايي ټولنې تازه په یوه خپاره کړي راپور کې په افغانستان کې د څښاک پاکو اوبو ته د خلکو د نه لاسرسي په اړه ژوره اندېښنه څرګنده کړې ده.
د اروپايی ټولنې دفتر دا هم ویلي دي چې له نورو مرسته کوونکو هېوادونو سره په ګډه هڅه کوي، چې دغه بحران حل کړي.
د اسیا لپاره د اروپايي ټولنې د بشري مرستو دفتر په راپور کې راغلي دي: « په افغانستان کې د کلونو جنګ جګړو او د اقلیمي شرایطو د لا خرابیدو له امله اوبه کمیابه شوې دي او په افغانستان کې له یوویشت میلیونه څخه زیات خلک د څښاک پاکو اوبو ته لاسرسی نلري. د اروپايي ټولنې دفتر له نورو مرسته کوونکو هېوادونو سره یو ځای هڅه کوي، چې د افغانانو د کورونو ترڅنګ ژورې څاه ګانې وباسي او لاسي پمپونه ولګوي.
په ورته وخت کې د ماشومانو لپاره ملګرو ملتونو د اماناتو صندوق یا یونسف هم ویلي دي چې د نورو ستونزو ترڅنګ وچکالي هم د افغان ماشومانو روغتیا ګواښي.
په همدې حال د کابل ښار ځینې اوسیدونکي له دغه حالته سر ټکوي او وايي چې د څښاک پاکو اوبو د ترلاسه کولو لپاره هره ورځ د اوږد واټن مزل کوي. دوی له افغان حکومته او نړیوالو سازمانونو غواړي چې ددغې ستونزې د حل لپاره جدي ګامونه پورته کړي.
د کابل اوسېدونکی نورالله وايي: « موږ د اوبو مشکل لرو، کور مو ډېر لرې دی کله اوبه وې او کله نه وې، موږ څه وکړو ډېر یخ هم دی چې اسمان وریځ وې اوبه بیا نه وې.»
د کابل ښار اوسیدونکی فرزاد وايي : « اوس خو ژمی دی ډېر وخت لمر وې، خلک په اوونیو اوبه نلري.
د کابل بل اوسېدونکی احمد فرهاد وايي: « هیله لرو چې مسوولین د اوبو او اوبو رسولو پروژو برخه کې جدي پاملرنه وکړي.
دغه حالت ته په کتو دا پوښتنه مطرح کېږي چې په افغانستان کې حکومتونو ولې د اوبو د ښه مدیریت لپاره پلان او ستراتیژۍ نه وې جوړې کړې؟
د چاپیریالي مسایلو کارپوه سید شاه ګهرپور وايي: « د اوبو بنسټیزو سرچینو، هایدرولیکې سیمو ته ناپاملرنه، اوبو منظم دوران نشتوالی، د طبیعي سرچینو نه ساتنه او نه پاملرنه، د افغانستان اسعاري زیرمو ته نه لاسرسی، د ملګرو ملتونو او نړیوالو بنسټونو نه همکاري په افغانستان کې د څښاک پاکو ته نه لاسرسي کچه لوړه کړې ده.»
و مو غوښتل چې په دې اړه د حکومتي چارواکو نظر هم راواخلو خو د دوی د نظر په ترلاسه کولو بریالي نشو.
دا لومړې ځل نه دی چې یوه نړیواله اداره په افغانستان کې د څښاک پاکو اوبو ته د نه لاسرسی په اړه اندېښنه څرګندوي تر دې مخکې ملګرو ملتونو هم په ځلونو ورته اندیښنې څرګندې کړې وې.
