پکتیا ولایت کې له ۱۰۰۰ اړمنو کورنیو سره د چهار شنبې پر ورځ د «۱۴۰۰ کال سلواغې پر ۲۷ مه» د المان سولې کلي موسسې له لوري د خوراکي توکو مرسته وشوه.
د پکتیا سرې میاشتې مشر الیاس ناصري وايي، دغه مرسته مرکز ګردیز او زرمت ولسوالۍ کې پر هغو کورنیو ووېشل شوه،چې غړي یې د مخکیني حکومت او د اسلامي امارت د امنیتي ځواکونو په لیکو کې وژل شوي دي.
ناصري زیاته کړه:« له دغو بې وزله کورنیو سره دغه مرسته د المان سولې کلي موسیسې له لوري ترسره شوه ، چې اوړه ، وریجې ، لوبیا ، دال ، بوره او مالګه په کې شامل دي.»
د مخکیني حکومت او د اسلامي امارت لیکو کې د وژل شویو سرتیرو کورنیو غړي د خوراکي توکو مرسته کولو ته خوشاله دي،خو له مسوولینو او مرستندویه بنسټونو د کار موندنې برخه د همکارۍ غوښتنه کوي.
د مخکېني حکوت د یوه وژل شوي سرتیري کورنۍ غړی وايي:« کارونه نه شته دی. زموږ غوښتنه دا ده،چې د کار زمینه راته برابره شي. هیڅوک کار نه لري او له دا ډول مرستو ډېره مننه کوو.»
د مخکېني حکوت د یوه بل وژل شوي سرتیري کورنۍ غړی بیا وايي:« له موسیسومو غوښتنه دا ده،چې په کورونو کې کونډې یتمیان لرو، ډېر بې وزله یو. له موږ سره دې مرسته وشي.»
د المان سولې کلي موسسې مشر ینس وايي، هېواد یې له دېرشو کلونو راهیسې د ماشومانو د روغتیا برخه کې کار کوي او اوس پر بې وزله کورنیو د خوراکي توکو ویش یې پیل کړی، چې راتلونکې کې به هم دوام وکړي.
ینس زیاتوي:« له دېرشو کلونو ډېره موده کېږي،چې موږ دلته افغانستان کې چې له سرې میاشتې سره همکاري لرو او په ځانګړي توګه د هغو ماشومانو برخه کې چې سوزیدلي وي درملنه یې کوو. اوس مو د خوراکي توکو مرستې هم پیل کړي او دا مرستې به راتلونکي کې هم دوام وکړي.»
د المان سولې کلي موسیسې مسوولین وایي،امکاناتو ته په کتو به ورته مرستې د پکتیا نورو ولسوالیو ته هم وغځوي او یو شمیر نور مرستندوبه بنسټونه به هم وهڅوي.
