پوهنې وزارت وایي، د اسلامي امارت له واکمنېدو راهیسې په ټول هېواد کې ۱۳۶۸ ودانۍ ښوونځيو او مدرسو ته جوړې شوې او دغه راز په یاد موده کې د ښوونځيو او مدرسو اړوند ۳ زره ٩٧٠ ودانۍ بیارغول او ترمیم شوي هم دي.
د دې وزارت د مسوولانو په خبره، پوهنې وزارت د خپلې بودیجې اوهم د همکارو بنسټونو په مالي ملاتړ د روان ښوونیز کال له پیل راهیسې په کابل، غزني، بامیان، کونړ، جوزجان، لوګر، پکتیا، نیمروز، لغمان، سرپل، زابل، غور، ارزګان، کندهار، فاریاب، هرات، بغلان، فراه او پکتیکا ولایتونو کې د ۲۳۸ بابه ښوونځیو او مدارسو لپاره نوې ودانۍ جوړې شوې او یا هم تر کار لاندې دي چې شاوخوا ٢.٥ میلیارده افغانۍ لګښت پرې راغلی.
د پوهنې وزارت ویاند منصوراحمد حمزه وايي: « د افغانستان اسلامي امارت د پوهنې وزارت هڅه کوي چې د زده کوونکو لپاره معیاري، خوندي او هوسا چاپېریال رامنځته کړي. د پوهنې وزارت له عادي بودیجې، د خیریه بنسټونو او معارف دوسته خلکو په په مالي ملاتړ د ۱۴۰۴ کال له پیل راهیسې د کابل ښار په ګډون، ۱۹ ولایتونو کې د ۲۳۸ بابه ښوونځیو او مدارسو لپاره نوې ودانۍ جوړې شوې او یا هم تر کار لاندې دي. پر دغو پروژو ۲.۵ میلیارده افغانۍ لګښت راغلی.»
نوموړی زیاتوي، د کابل په ګډون ۳۱ ولایتونو کې د پوهنې وزارت د بودیجې او د مرستندویه ادارو په مالي ملاتړ د ۹۷۰ بابه ښوونځیو ودانۍ ترمیم شوې او یا هم تر کار لاندې دي چې پر دغو ترمیماتي پروژو شاوخوا ۱ میلیارد،۲۷۰ میلیونه، ۷۴۶ زره او ۲۷۵ افغانۍ لګښت راغلی.
د پوهنې وزارت ویاند زیاتوي، دا وزارت ژمن دی چې د هېواد ټولو برخو ته دیني او عصري زده کړې په متوازنه توګه ورسوي او هېڅوک له زده کړو محروم پاتې نه شي.
د پوهنې وزارت ویاند زیاتوي: « همدارنګه د کابل ښار په ګډون په ۳۱ ولایتونو کې د پوهنې وزارت له عادي بودیجې او د خیریه بنسټونو او معارف دوسته خلکو په مالي ملاتړ د ۹۷۰ بابه ښوونځیو ودانۍ ترمیم او بیا رغول شوې او یا هم تر کار لاندې دي. پر دغو ترمیماتي پروژو ۱ میلیارد، ۲۷۰ میلیونه ۷۴۶ زره افغانۍ لګښت راغلی. د یادونې وړ ده چې د دغو رغنیزو او ترمیماتي پروژو ډېره برخه بشپړې شوې او پاتې یې تر کار لاندې دي.»
بل پلو، ښوونکي او استادان د زده کړو کیفیت پر ښه والي ټینګار کوي او وايي، په ښوونځیو کې باید د زده کوونکو لپاره لا ښې اسانتیاوې برابرې شي.
د پوهنتون استاد محمد اسلم دانشمل وايي: « د ښوونیز نصاب منظمول او د مرستندویه درسي موادو چمتو کول د دې سبب کېږي چې هېواد کې د ښوونې او روزنې بهیر ګړندی شي.»
د چارو شنونکی ادریس محمدي ځاځی وايي: « یو د دنیا لپاره کار کوي او بل د آخرت لپاره. دا دواړه باید متوازن پرمخ لاړ شي ترڅو هم په دې نړۍ کې سر لوړي شوی او هم هغه نړۍ کې.»
مسوولان وایي، د پکتیکا، نورستان، کابل، کونړ، ننګرهار او میدان وردګو ولایتونو په مرکزونو او ولسوالیو کې د روان کال له پیل راهیسې د خلکو او همکارو بنسټونو له لوري د خوراکي توکو، نغدو پیسو او ودانیو په برخه کې شاوخوا ۹۲ میلیونه، ۹۱۴ زره او ۴۸۴ افغانۍ مرسته شوې. دا مرستې د ښوونیز چاپېریال د پیاوړتیا او د زده کوونکو د اړتیاوو پوره کولو په موخه لګول شوې دي.
