Skip to content
په سویس کې د جنیوا کال غیر دولتي بنسټ څلور ورځينۍ ناسته،چې د اسلامي امارت پلاوي، نړیوالو بنسټونو او د نړیوالې ټولنې استازو ترمنځ د بندو دروازو ترشاه له اوږدو بحثونو وروسته د افغان پلاوي او جنیوا کال بنسټ ترمنځ د بشردوستانه خبرپاڼې په لاسلیک کولو پاېته و رسېده.
رسنیو ته هم د اسلامي امارت له لورې د دغه ناستې وروستۍ بیانیه رسیدلې ده.
د جنیوا کنفرانس وروستۍ بیانیې یوه برخه:« موږ د اسلامي امارت استازي په دې باور یو،چی د ملکي وګړو ساتنه، د هغوی بنسټیز حقونه، له هغوی سره انساني چلن، هغوی ته د ژوند خوندي چاپیریال برابرول د هغوی حق دی. باور لرو،چې د خوراکي توکو، اوبو او نورو شیانو د ملکي وګړو په قصدي توګه محرومول،چې د دوی د بقا لپاره اړین دي، هیڅکله توجیه نلري او بشردوستانه سازمانونه، د بشري اصولو سره سم، کولی شي،د خلکو اساسي اړتیاوو ته د رسیدلو لپاره مرستې وکړي. د بشري مرستو، تجهیزاتو او پرسونل په ساتنه باندې بیاځلې ټینګار کوو.»
بیانیه کې،له نړیوالې ټولنې غوښتل شوي،چې د ماینونو او چاودیدونو توکو د پاکولو په برخه کې دې لاس په کار شي.
د جنیوا کنفرانس وروستۍ بیانې یوه برخه:«پر نړیوالې ټولنې غږ کوو،خپل سازمانونه، چې د بشري منشور له مخې دلته کار کوي، ملاتړ یې وکړي،څو غیرې سیاسي، بې طرفه او مستقلانه مرستې افغانانو ته ورسوي. نړیوالې ټولنې ته بلنه ورکوو،چې له اسلامي امارت سره، د شفافیت او حساب ورکولو پر بنسټ مخ ته ولاړ شي.»
بل پلو د سیاسي چارو شنونکی طارق فرهادي،چې جنیوا کې د اسلامي امارت پلاوي سره لیدلي وایي، دغه لیدنه د افغان حکومت او بشري سازمانونو ترمنځ د تفاهم په موخه وه.
ځينې نور بیا په دې باور دي،چې دا ډول ناستې د نړیوالو اندیښنو حل لپاره دي،چې اسلامي امارت باید ورته قناعت ورکړي.
وروستیو نږدې شپږو میاشتو کې،چې اسلامي امارت په افغانستان واک ته رسیدلی، نړیوالې ټولنې سره اړیکې د ښه والي لور ته روانې دي. شنونکي په دې باور دي، که نړیوال قانع شي،چې ورسره شوې ژمنې نه ماتیږی، ښایې لګول شوي بندیزونه لرې او د اسلامي امارت حکومت رسمیت پیژندنې ته لار هواره شي.
