د افغانستان اسلامي امارت بهرنیو چارو وزارت وايي، اوس فعال بهرنی سیاست لري او کولای شي،چې ګاونډیانو،سیمې او نړۍ ته قناعت ورکړي .
د یاد وزارت د درېیم ریاست مشر ذاکر جلالي وايي:«افغانستان دتیر په پرتله اوس یوه ډینامکه او متحرکه د دیپلوماسۍ دستګاه لري او یو متحرک خارجي سیاست لري له ګاونډیو نیولې تر سیمې هیوادونو او په ټوله کې اسیايي هیوادونه او حتي دنړۍ له هیوادونو سره ناستې ولاړې لري سفرونه لري او لیده کاته لري.»
جلالي وايي،د سیمې او نړۍ له ډېرې برخې هېوادونو سره یې دوه اړخېزې اړیکې ټینګې کړي او تمه لري،چې له لویدیځو هېوادونو سره په دې تړاو روانې خبرې هم ژر پایله ورکړي.
جلالي زیاته کړه:« موږ له لویه برخه هېوادونو سره دوه اړخېزه اړیکه کې یو،له غربي نړۍ سره او اروپايي هېوادونو سره په دې وروستیو کې ناستې شوي دي،چې زما په باور دغه ناستې،مذاکرات او مجلسونه کولای شي،چې د دواړه لورو سره چې کوم غلط برداشتونه دي او غلط فهمۍ دي،دهغو په کمولو کې او له منځه وړلو کې ډېر موثر تمام شي.»
د سیاسي چارو یو شمېر تحلیل کوونکي بیا وايي، د افغانستان نوي نظام د عدم مشروعیت ستونزه هغه مهال حل کېدای شي،چې اسلاميامارت له نړیوالو سره خپلې ژمنې عملي کړي او په خبره یې افغان ولس هم د نورو ملتونو په څېر دا حق لري،چې حکومت یې پر نړیوال کچه پر رسمیت وپیژندل شي.
د سیاسي چارو تحلیل کوونکی طارق فرهادي وايي:«حکومت په افغانستان کې ځینې ژمنې کړې وې، هغه چې بشپړې شي،د مشروعیت شرایط به نور هم برابر شي او نړۍ هم همدا غواړي.بالاخره موږ افغانستان خلک هم د ځکمې پر سر ژوند کوو او ولس یو او باید پر رسمیت وپیژندل شو.»
له دې وړاندې د افغانستان د بهرنیو چارو وزارت ویلي وو،چې هغه ټول معیارونه یې پوره او برابر کړي،چې دیو د حکومت د رسمیت پیژندنې لپاره اړین دي،خو نړۍ او امریکا لاهم په خپلو شرطونو کلک ولاړ دي او د ټول شموله حکومت جوړښت یې د فهرست په سر کې دی.
