ملګرو ملتونو په خپل تازه خپور شوي راپور کې اسلاميامارت په نه ژمنتیا تورن کړی او ادعا یې کړې،چې لا هم له القاعده ډلې سره اړیکې لري.
د یاد سازمان په تازه راپور کې ویل شوي،چې تیر اکټوبر میاشت کې د القاعده شبکې د مخکیني مشر اسامه بن لادن زوی له طالبانو سره کتلي دي.
که څه هم اسلامي امارت تر اوسه پورې د ملګرو ملتونو ادعا ته غبرګون نه دی ښودلی،خو کارپوهان وايي،امریکا ویلي وو،چې القاعده منحل شوي،نو اوس باید له هغوی پوښتنه وشي،چې دا خلک څوک دي چې له اسلامي امارت سره اړیکې لري.
سیاسي چارو کارپوه بلال فاطمي وايي:«کله چې دوی په قدرت کې وو ، دوی ویلي و،چې القاعده نوره منحل شوې ده او له منځه تللې ده،نړۍ ته چې اوس خطر دی، هغه له داعش دی. بله خبره دوی دا کړې وه چې د القاعده د مشر زوی هم دوی وژلی دی. اوس یې دا له کوم ځای راغی او بل دا چې منحل شوې ډله بیرته څه ډول را پیدا شوه، دې ته باید دوی ځوابونه ووايي.»
یو شمېر نور بیا په دې اند دي،چې نړۍ دې اسلامي امارت ته پلمې نه ګوري او د افغانستان ښیې راتلونکي لپاره دې همدا نظام پر رسمیت وپیژني.
د سیاسي چارو کارپوه عاطف مختار وايي:«له طالبانو سره د اسامه د زوی لیدل هیڅ علمي او څیړنیز بنسټ نه لري، دلته یو نظام منځ ته راغلی چې د خلکو د باورونو او اعتقادونو له منځه وتلی اوس نړۍ ته دا پکار ده چې اسلامي امارت په رسمیت وپیژني.»
یو شمیر نور بیا په دې اند دي،چې اسلامي امارت واک ته له رسیدو سره له نړیوالو سره ژمنه کړې وه،چې د دوی له خاورې به هغوی ته ګواښ نه پیښیږي او اوس اړ دي،چې داسې کسانو ته اجازه ور نه کړي،چې له نړۍ سره د دوی اړیکې خرابولی شي.
د سیاسي چارو کارپوه شفیق همدرد وايي:« طالبان وړاندې تر دې،چې واک ته ورسیږي، له نړۍ سره یې ژمنه کړې وه،چې د افغانستان خاوره به د چا خلاف نه استعمال کېږي او هغو کسانو ته به ځای نه ورکول کېږي،چې له نړۍ سره تعامل نه لري. نو که طالبان غواړي،چې پر رسمیت وپیژندل شي،نو په کار ده،چې په خپلو کړیو ژمنو عمل وکړي او داسې کسانو ته اجازه ور نه کړي،چې د افغانستان اړیکې له نړۍ سره خرابوي.»
