د خوراکي توکو د عمده پلورونکو ټولنې مشر سیدکمال فرید ساپی وايي:« له تیرو دوو ورځو راهیسې په کابل ښار کي د افغانیو پر وړاندې ډالرو خپل ارزښت له لاسه ورکړی دی. د غوړو او اوړو په برخه کې تر څلوره سوه افغانیو پوري ټیټوالی راغلی دی.»
د سوداګرۍ خونې مرستیال نصیر احمد عرب بیا له کابل ښاروالي غواړي،چي د خوراکي توکو بیو د کنټرول لپاره دې په بازار څار زیات کړي او په دې موخه دې یو کمیسیون جوړ کړي٬،ترڅو له هغو کسانو سره قانوني چلن وکړي،چي احتکار او خپلسري کوي.
عرب زیاته کړه:« په حقیقت سره په بازارونو کي د بیو ټاکل د کابل ښاروالۍ مسولیت دی، کمیسیون جوړ کړي او هره ورځ له سوداګرۍ خونې نړیوالو او کورنۍ نرخونه و څیړي او وروسته له هغې بازار ته وړاندي شي.»
بل پلو د اقتصادي چارو شنونکي نیوکه کوي،چي یو شمیر پلورونکي او هغه سوداګر چې له پخوا څخه خوراکي توکي زیرمه کړي، د ډالروبیو لوړېدو سره یې بازار ته وړاندې کوي، چې باید مخنیوی یې وشي.
په کابل ښار کې له تیرو پنځه میاشتو راهیسې د خوراکي او نورو لومړنیو توکو بیې لوړي دي او پلورونکي یې عمده لامل د ډالرو پر وړاندې د افغانیو ارزښت را کښته کیدل یادوي، خو د ډالرو بیو له ټیټوالي سره بیا هم خلک شکایت کوي،چې د خوراکي توکو په بیو کي ټیټوالی نه دی راغلی.
