د هرات په ګلران ولسوالۍ کې د «عصري کرنې» پروژه د ۱۳ میلیون افغانیو په لګښت عملي شوه.
محلي مسوولین وايي، په وروستیو کلونو کې د اقلیمي بدلون، د اورښت او اوبو کموالي له امله د کرنې سکټور زیانمن شوی او دا پروژه یې د اوبو زېرمه کولو او اقلیمي بدلونونو پر وړاندې د اغېزناکې مبارزې په موخه تطبیق کړې ده.
هرات کې د افغاني سرې میاشتې ټولنې رییس احمد راشد وايي: « موږ د ګلران ولسوالۍ په یوه کلي کې دا پروژه پلي کوو. دا پروژه دوه فازه لري؛ لومړی فاز یې له چې وینئ د اوبو زېرمه کوونکی بند دی او کارونه یې بشپړ شوي، دویم فاز یې کرنه او عصري کرنه ده چې په تړاو یې ۳۱۰ تنه سروې شوي او هر نفر ته ۲۵ زره افغانۍ د پستې د باغونو او ځنګلونو جوړولو لپاره ورکول کېږي.»
د ګلران اوسېدونکي وایي، د اوبو بند جوړول، خلکو ته د پستې نیالګیو وېشل او د پایدارې کرنې روزنیز پروګرامونه به له دوی سره مرسته وکړي چې د اوبو سرچینې په ښه توګه مدیریت او د اقلیم بدلون پر وړاندي مقاومتي کرنیزې طریقې وکاروي.
کروندګر محمد نادر وايي: « زموږ اوبه هسې وړیا ترکمنستان ته روانې وې. اوس چې دا بند وتړل شو، له اوبو به یې زموږ خلک ګټه واخلي. موږ د دې پروژې له امله د سرې میاشتې مننه کوو.»
کروندګر خان محمد وايي: « سرې میاشتې موږ ته داسې کار وکړ چې تر اوسه د ټول هرات په کچه نه دی شوی. د دې بند په جوړېدو سره به زموږ ډېر ځمکې خړوبې شي، همدارنګه زموږ باغداري، مالداري او نورې چارې به له ستونزو وژغورل شي.»
په دې پروژه کې د اوبو زېرمه کوونکی کوچنی بند هم شامل دی چې د ۳۶ متر اوږدوالي او ۷ متر جګوالي لري او کولی شي چې ۱۵ زره متر مکعبه اوبه زېرمه کړي.
