سوزکي وایي، د خوړو نړیوال سازمان او یونسیف د بشري مرستو رسول لا مخکې پیل کړي او له نورو اړوند ادارو او مرستندویه بنسټونو سره اړیکه کې دي،چې بېلابېلو برخو کې مرستې پیل کړي.
هغه زیاتوي:« ډېرې ادارې او ایجنسۍ دلته کار کوي،لکه یونسیف او د خوړو نړیوال سازمان، دوی پر مرسته کولو بوخت دي.موږ نورو ادارو سره هم کار کوو،چې ستاسو د اړتیاوو او غوښتنو ته په کتو دلته کار پیل کړي.»
قومي مشرانو د یوناما له مشرې وغوښتل،چې د ژمي په سړه هوا او روان بد اقتصادي حالت ته په کتو دې خپلې بشري مرستې زیاتې کړي،ترڅو هغو کورنیو ته ورسیږي،چې تر اوسه پورې یې نه دي ترلاسه کړي.
د سیدکرم ولسوالۍ یو تن قومي مشر وايي:« زموږ خلک په ټولییز ډول بد اقتصادي حالت کې دي،بې کاري په اوج کې ده،ملګري ملتونه دې خپلې بشري مرستې زیاتې کړي،تر څو هغو کورنیو ته ورسیږي،چې لا یې نه دي ترلاسه کړي.»
قومي مشران وایي، ملګري ملتونه دې د پوهنې، روغتیا او بیارغونې لپاره دې ځانګړې بودیجه اعلان کړي او افغانان دې په دې سخت حالت کې له پامه نه غورځوي.
د سیدکرم ولسوالۍ یو تن قومي مشر وايي:« له موږ سره دې ملګري ملتونه د پوهنې،روغتیا او بیارغونې برخه کې مرسته وکړي او موږ دې په دې سخت حالت کې یوازې نه پریږدي.»
