د افغانستان لپاره د امریکا بیارغونې څار ادارې یا سیګار مشر جان ساپکو د مخکني حکومت د امنیت شورا سلاکار حمدالله محب ورغوښتی او په دې تړاو یې ترې پوښتنې او ګرویږنې کړې دي.
حمدالله محب د سقوط پر ورځ د مخکېني ولسمشر له لوري د پیسو اېستلو په تړاو څه نه دي ویلي، خو خپل اکونټونه یې سیګار ته ښودلي او له هغوی سره یې په دې قضیه کې د همکارۍ ژمنه کړې.
محب زیاته کړې:« ما خپل بانک اکونټونه او خپله شتمني هم د افغانستان پر بیارغونې د ځانګړي څار سازمان یا سیګار ته وښودې او زه راتلوونکي کې هم چمتو یم،چې له هغوی سره هر ډول همکاري وکړم.»
سیګار وايي،د سقوط له ورځو راپدیخوا پر محمد اشرف غني تورونه دي،چې شااوخوا ۱۵۰ میلیونه ډالر یې له ځان سره اېستلي دي.
مخکېني ولسمشر اشرف غني ته یو بل نږدې شخص، فضلي محمود فضلي بیا وايي، سیګار تر اوسه ولسمشر سره په مستقیم ډول په دې تړاو خبرې نه دې کړي.
فضلي زیاته کړه:« زه له ولسمشر اشرف غني سره په اړیکه کې یم، سیګار تر اوسه له هغه سره د شتمنۍ په تړاو یې او یا له افغانستان د پیسو اېستلو په اړه مرکه نه ده کړې. دا به لیونتوب وي،چې ووایم، په افغانستان کې فساد نه و، سیګار کولای شي،پراخې او شفافي څېړنې وکړي او زه ورسره هر ډول همکارۍ ته چمتو یم.»
فضلي په یوه مرکه کې ویلي، ښايي ارګ کې به دومره پیسې نه وې،خو پخواني ولسمشر حامد کرزي ټینګار کړی دی،چې سي آی ای په تیرو کلونو کې ارګ ته ډېرې پیسې ورکړي.
اخوا د سیاسي چارو یو شمېر کارپوهان بیا په دې نظر دي،چې د تیر حکومت د چارواکو پر یو بل شاهدي کول د دې لپاره دي،چې هر یو ځان بې ګناه ثابت کړي او مقابل لوری پړ کړي.
د سیاسي چارو کارپوه طارق فرهادي وايي:« دا ډول څېړنې معمولآ څو پړاونه لري، لومړی یې خپله له هغوی پوښتي چې څېړنه ترې کوي. وروسته له هغې ښايي د فساد شریکان د یو بل پر ضد شهادت ورکړي. د دې لپاره چې هر یو ځانونه وژغوري، دغه مهال بیا حقایق مخ ته راځي او پنځه روپۍ هم له جیبونو وځي، خو ساپکو یوازې د امریکا د پیسو په تړاو څېړنه کوي.»
د سیګار مشر جان ساپکو هم ټینګار کړی،چې تر اوسه په مشخص ډول څرګنده نه ده،چې پیسې اېستل شوي وي.
په پام کې ده،چې د سیګار مشر راتلونکې مارچ میاشت کې کانګرس وغوښتل شي او د سقوط د لاملونو او د پیسو اېستلو په تړاو ترې د مالوماتو پوښتنې وشي.
