د روسیی ولسمشر ولاديمیرپوتین چې د هند په بلنه په یوه دوه ورځني سفر نوي دیلي ته تللی و، د هند له لومړي وزیر نرېندرا مودي او نوور هندي مشرانو سره یې په ګڼو دوه اړخیزو همکاریو هوکړې وکړې او په ګډه خپره کړې اعلامیه کې یې افغانستان ته هم اشاره کړې.
په دې ګډه اعلامیه کې چې هند ته د پوتین د سفر په پای کې خپره شوې، د داعش ډلې او نورو ترهګرو ډلو پر وړاندې د اسلامي امارت هڅې ستایل شوې دي.
اعلامیه کې د ترهګرۍ پر وړاندې مبارزه کې له کابل سره د مسکو او نوي ډیلي پر هر اړخیزې او اغېزناکې همکارۍ د ټینګار ترڅنګ، د روسیې په کوربه توب د مسکو فارمټ ناستو پر اهمیت او رول هم ټینګار شوی.
د هند او روسیې د کلنۍ سرمشریزې ګډه اعلامیه کې ویل شوي: « د دواړو هېوادونو مشران د داعش خراسان څانګې او نورو نړیوالو ترهګریزو ډلو پر وړاندې شوي اقدامات ستایي او ډاډ څرګندوي چې په افغانستان کې به د ترهګرۍ ضد مبارزه هراړخیزه او اغېزناکه وي.»
د اعلامیې له مخې، دواړو خواو د افغانستان په تړاو د هند او روسیې د نږدې همغږۍ ستاینه کړې چې له مخې یې په دې برخه کې د دواړو هېوادونو د امنیت شوراګانو همغږي هم شامله ده.
د دې ترڅنګ، دواړو خواو له افغانانو سره پر بېړنیو او دوامداره بشري مرستو هم ټینګار کړی.
د هند او روسیې د کلنۍ سرمشریزې ګډه اعلامیه کې راغلي: « دواړو خواو د افغانستان په تړاو د هند او روسیې د نږدې همغږۍ ستاینه کړې چې په کې د دواړو هېوادونو د امنیت شورا ګانو ترمنځ د خبرو اترو د مکانېزمونو له لارې همغږي هم شامله ده.»
د چارو شنونکي د افغانستان په تړاو د هند او روسیې د همغږې دریځ د اسلامي امارت د هغې رغوونکې او د نه مداخلې پر اصولو ولاړې پالیسۍ پایله ګڼي چې په تېرو څه باندې څلورو کلونو کې یی د نړۍ او سیمې د هېوادونو پر وړاندې خپله کړې ده.
د دوی په باور، له هند او روسیې سره نږدې کېدل او د اړیکو جوړول منفي او مثبت اړخونه لري، خو دا اوس اسلامي امارت پورې اړه لري چې د دوی له دریځه په څه ډول د ځان په ګټه کار اخلي.
د سیاسي چارو شنونکی مجتبی کوهکن وايي: « هغه ټکي چې د افغانستان په اړه بیان شوي، د دې څرګندونه کوي چې افغانستان بریالی شوی چې یوه رغنده پالیسي تعقیب کړي او په معادلاتو کې خپل ځای وساتي. د دغو دواړو هېوادونو د نږدې اړیکو په اړه زما باور دا دی چې په نړیوالو اړیکو کې دایمي دوست او دایمي دښمن نه شته، هرڅه د ګټو پر بنسټ وي. دغو دواړو هېوادونو ته د افغانستان نږدې کېدل هم ګټې لرلی شي او هم زیانونه.»
دا په داسې حال کې ده چې اسلامي امارت په تېرو څه باندې څلورو کلونو کې د روسیې په ګډون د سیمې له اکثریت هېوادونو سره رغنده اړیکې پاللې دي.
روسیه د نړۍ لومړنې هېواد دی چې د افغانستان اسلامي امارت یې په رسمیت پیژندلی. هند هم له کابل سره د اړیکو د عادي کولو اړوند هڅو په لړ کې اعلان کړې چې په کابل کې د خپل ډېپلوماټیک ماموریت کچه د سفیر درجې ته لوړوي.
کتونکي دا پرمختګونه د اسلامي امارت رغنده، سوله ییز او د یو بل په چارو کې د لاسوهنې نه کولو سیاست زېږنده بولي او باور لري چې په راتلونکي کې به نورو ورته پرمختګونو ته هم زمینه برابره کړي.
