د افغانستان اسلامي امارت بهرنیو چارو و زارت چارسمبالی وزیر امیرخان متقي یو ځل بیا ټېنګار سره ویلي، حکومت ټول شموله دی او نړۍ دې بې ځایه پلمې نه ګوري.
متقي ویلي، هېڅ څوک ورته داسې بیلګه نه شي وړاندې کولای،چې یو لوري دې د انقلاب، کودتا اویاهم د ولسواکۍ له لارې واک نیولی وي او بیا دې مات شوي اړخ مشران په خپل حکومت کې پرر لوړو پوسټونو وګوماري .
متقي زیاته کړې:« دا چې زموږ په کابینه کې د حکومت په راس کې ولې د تیر حکومت پخواني خلک نه دي راغلي،نو تاسو یې په نړۍ کې یوه نمونه راته وښايئ، هغه بله ورځ چې بایډن په امریکا کې انتخابات وګټل ایا په خپله کابینه کې یې د ټرمپ کوم کس واخیست. په نړۍ کې چې حکومتونه بدلیږي،که د انتخاباتو له لارې بدلیږي،که انقلات او یاهم د کودتا له لارې بدلیږي،څوک چې واک ته ورسیږي هغه د خپل اعتماد وړ کسان راولي او کار ترې اخلي.»
امیرخان متقي وايي،که د اشرف غني تیر حکومت ټول شموله و،نو اوسنی نظام هم ټوله شموله دی،ځکه د تیر حکومت پنځه سوه زره مامورین ورسره دا اوس پر دندو بوخت دي .
متقي وايي، امریکا او نوره نړۍ له ټول شموله حکومته مشخص تعریف نه لري او نه هم اوسنی حکومت چې ټول مامورین یې د تیر حکومت دي، ټول شموله ګڼي او په وینا یې یوازې پلمې لټوي.
نوموړی وايي، که له ټول شموله حکومت هدف دا وي،چې د ټولو سیمو او قومونو استازې دي په کې شامل وي، نو د سرپرست حکومت کابینه کې د ټولو مېشتو قومونو او سمتونو استازي ونډه لري.
هغه زیاتوي:« که له ټوله شموله حکومته د نړۍ مراد دا وي،چې له ټولو سیمې وزیران په کابینه کې ولرو،نو د پنجشیر لرو، د فاریاب لرو، د بدخشان لرو، د کندهار لرو، د کابل لرو، د ننګرهار لرو او که د اشرف غني حکومت ټول شموله وو، نو د هغه خو ټول مامورین چې پنځه سوه زره کیږي،له موږ سره کار کوي. هغه ټول شموله بولې او اوس چې کار کوي ټول شموله یې نه بولې، چې نه د ټول شموله لپاره یو تعریف لرې نه یو مثال لرې او نه دا موجوده ټول شموله بولې،بیا خو هسې پلمې دي، چې کوې یې.»
اخوا په ناروې کې د افغانستان پخوانۍ سفیره شکریه بارکزۍ بیا وايي، د رسمیت پیژندنې په بدل امریکا له لوري د بندیانو خوشې کولو مسله د دې هېواد د ولسمشر شخصي خبره ده او په ټوله کې امریکا ، اروپايي ټولنه او نور لودیځوال د افغانسان د نوي نظام د رسمیت پیژندنې په برخه کې پر خپلو شرایطو ولاړ دي.
هغې زیاته کړه:« زما په اند باندې امریکا اروپايي ټولنه او نور هېوادونه د طالبانو د رسمیت پیژندنې په برخه کې پر خپلو شرایطو باندې ولاړي دي او په اوسنیو شرایطو کې افغانستان ثبات ته اړتیا لري او ترهغې به ثبات تامین نه شي،چې د افغانستان شته واقیعتونه په سمه توګه ونه پیژندل شي.»
تازه د امریکا متحده ایالتو ولسمشر جو بایډن پر اسلامي امارت غږ کړی،که غواړي د نړیوال مشروعیت ارمان یې پوره شي او دوی یې د حکومت په رسمیت پيژندلو غور وکړي، له دوی سره اسیر متقاعد پخوانی پوځي مارک فریجرز دې خوشې کړي.
