مجاهد: د پخواني نظامیانو وژل کېدو په اړه د ملګرو ملتونو راپور ناسم دی

اسلامي امارت ویاند او د اطلاعاتو او فرهنګ وزارت مرستیال ذبیح الله مجاهد  وايي، د ملګرو ملتونو هغه راپور ناسم دی،چې ګنې د تیر نظام له سقوط وروسته یې د مخکیني حکومت امنیتي او حکومتي کار کوونکي وژلي دي.

نوموړي زیاته کړې،چې د دوی لخوا له عفوې وروسته هېچ چاته اجازه نه شته دی،چې چاته زیان ورسوي.

هغه ټینګار کړی دی،که د شخصي غچ له امله داسې کومه پیښه شوی وي، دوی یې پلټنه کړې او عاملین یې مجازات شوي دي.

د ملګرو ملتونو سرمنشي انتوني ګوترس د تیرې یکشنبې پر ورځ وویل، طالبانو د اګست د میاشتې له ۱۵مې راهیسې چې په کابل کې واک ته رسیدلي څه باندې ۱۰۰ تنه وژلي،چې د افغانستان د مخکني حکومت مامورین، د امنیتي ځواکونو غړي او یا هغه افغانان وو،چې له نړیوالو ځواکونو سره یې کار کاوه.