د اروپايي کډوالو ادارو او د بریتانیا حکومت ویلي، افغانستان بېړنیو بشري مرستو ته اړتیا لري او که د مرستو رسولو پر وړاندې پراته خنډونه لیرې نه شي،میلیونونه افغانان به نور هم له ګواښ سره مخ شي.
د ناروې د ګډوالو شورا اندېښنه څرګند کړې،چې په افغانستان کې بانکي سیستم فلج شوی او نه شي کولی، بشري مرستې ورسوي.
د ناروې د کډوالو شورا:« موږ په دې وروستیو کې د لوږې ځپلو افغانانو لپاره د څلور اعشاریه څلور ملیارده ډالرو غوښتنه وکړه. د بشردوستانه کار په تاریخ کې تر ټولو لویه غوښتنه ده، تر هغې چې د امریکا خزانې او نورو لویدیځ مالي چارواکي موږ ته د پیسو لېږدولو اجازه رانه کړي، موږ اړ یو،چې لاس تړلي کار وکړو.»
اخوا د سیاسي چارو یو شمېرر شنونکي د ناورې د کډوالو شورا دا اندېښنه پر ځای بولي او پر امریکا نیوکه کوي،چې دافغانستان پانګې په کنګل سره یې دغه هېواد ته د پیسو جریان درولی او بانکي سیستم فلج شوی دی.
د سیاسي چارو شنونکی قاضي محمد حسن حقیار وايي:« ګورئ! پر افغانستان یې ډېر تاثیرات دي. بانکونه تړل شوي، د راکړې ورکړې سیسټم تړل شوی، لېږد بند دی. طبیعي خبره ده،چې دا د مرستو پر رسولو باندې اغېزه کوي. پر اقتصاد او تجارت یې هم ډېر منفي تاثیر کړی دی. په دې اړه اروپايي ټولنه باید خپله امریکا سره همغږي وکړي او هغوی په افغانستان کې بشري ناورین ته متوجې کړي، که دغه تاثیرات پر افغانانو روان وي او افغانانو ته د نا کړې ګناه سزا ورکول کېږي، نو په افغانستان کې یو بشري ناورین رامنځته کېدونکی دی.»
نیوکې په امریکا او نړیوالې ټولنې دي،چې په لوی لاس نه غواړي،افغانستان ته بېړنۍ بشري مرستې ورسېږي او روان ناورین مهار شي.
