د افغانستان اسلامي امارت د رئیس الوزرا مرستیال عبدالسلام حنفي د شنبې ورځ د «۱۴۰۰ کال د سلواغې پر ۹ مه» په کابل کې د پاکستان ملي امنیت شورا له سلاکار معید یوسف او مل پلاوي سره لېدنه وکړه.
لېدنه کې دواړو لورو پر سوداګرۍ، ټرانزیټ او د سیمه ییزو سترو پروژو د تطبیق تر څنګ یې د افغانستان او پاکستان د اړیکو په تړاو خبرې کړې دي.
عبدالسلام حنفي افغان کډوالو ته د بشري مرستو رسولو او د پاکستان له کوربتوب مننه کړې او د ټاپې، ټاپ، کاسا زر او اوسپنې پټلۍ پروژو پر تطبیق یې د ټینګار تر څنګ ویلي، چې د اسلامي امارت تګلاره روښانه ده او هېچا ته د دې اجازه نه ورکوي،چې د افغانستان خاوره د ګاونډیو او نورو هېوادونو پر ضد وکارول شي.
حنفي یوسف ته ویلي، افغانستان هم له ګاونډیو ورته تمه لري.
حنفي له پاکستاني سوداګرو او پانګه والو غوښتي دي،چې په افغانستان کې د انرژۍ، کانونو کېندنې او کرنې په برخو کې پانګونه وکړي.
د پاکستان د ملي امنیت شورا سلاکار معید یوسف بیا ویلي، پاکستان د سترو سیمه ییزو پروژو تطبیق ته ژمن دی او باید د دواړو هېوادونو د خصوصي سکتور پلاوي ایجاد او د افغانستان او پاکستان ترمنځ د روغتیا، پوهنې، سوداګرۍ، کانونو او مالوماتي ټکنالوژۍ په برخو کې د اړیکو پر پراختیا خبرې وکړي.
په دې کتنه کې د صنعت او سوداګرۍ وزارت سرپرست او د افغانستان لپاره د پاکستان ځانګړي استازي په تورخم او سپین بولدګ کې افغان مسافرو، ناروغانو او سوداګرو ته د سوداګریزو او ترانزیټي اړیکو د ښه والي په موخه د لازیاتو اسانتیاوو پر برابرولو هم خبرې کړې دي.
