د پاکستان پوځي رژيم له لوري پر افغان خاوره تازه بريدونو او اوربند ماتولو د اسلامی امارت سخت غبرګون راپارولې او ګواښ یی کړی چې دا بريدونه به بې ځوابه نه پرېږدي.
حکومت پر اوربند سربېره د پاکستان پوځي رژيم دا بريدونه جنايت او د ټولو نړيوالو اصولو خلاف ګڼلي او زياته کړې يې ده چې له دې بې پايلې بريدونو سره پاکستان خپله ناکامي په روښانه توګه ثابته کړه.
په دې اړه د حکومت په اعلاميه کې ويل شوي، تازه بريدونو د کابل او اسلاماباد په اړيکو لا ترينګلتيا خطر رامنځته کړی.
د اسلامي امارت مرستیال ویاند حمد الله فطرت وايي: « د پاکستاني پوځيانو دا ډول جنایت نه يوازې دا چې کومه لاسته راوړنه نه ده بلکې يو ځل بيا ثابته شوه چې د غلطو معلوماتو پر اساس اقدام د وضعيت له لا ترينګلتيا او د پاکستان د پوځي رژیم له رسوایي او ناکامي پرته، بله پايله نه شي لرلی. د افغانستان اسلامي امارت دا سرغړونه او جنایت په کلکه غندي او يو ځل بيا تکراروي چې له خپل هوايي او ځمکني حريم او خلکو څخه دفاع خپل شرعي حق بولي او په مناسب وخت کې به لازم ځواب ورکړي.»
په ورته مهال، دا بریدونه په کوردننه او نړیواله کچه غندل شوي او پر افغان خاورې د پاکستان پوځي رژیم تېری یې له ټولو نړيوالو اصولو سره په ټکر کې یاد کړی.
پخواني امریکايي ډېپلومات زلمي خلیلزاد ویلي، د ملکي وګړو په نښه کول او د لویې جګړې د پیلولو خطر په ځان منل، د افغانستان او پاکستان ترمنځ د ستونزو حل نه دی.
نوموړي چې د ترینګلتیاوو مخنیوي لپاره یې له دواړو لوریو د زغم او رښتینې ډېپلوماسۍ غوښتنه کړې، تمه یې ښودلې چې د ترکیې یو لوړپوړی پلاوی به اسلاماباد او ښايي کابل ته سفر وکړي او پر داسې یو تړون کار وکړي چې پر یو بل د بریدونو مخنیوي په کې تایید شي.
زلمي خلیلزاد زیاته کړې: « زه دا بریدونه غندم. هغو کورنیو ته خپله خواخوږي څرګندوم چې عزیزان یې له لاسه ورکړي. د ملکي خلکو وژل او د لویې جګړې د رامنځته کېدو خطر لوړول د افغانستان او پاکستان د ستونزو حل نه دی. زغم لرونکې او واقعي ډېپلوماسي تر ټولو ښه لاره ده. راپورونه ښيي چې د ترکیې یو لوړ پوړی پلاوی به ژر اسلاماباد او شاید کابل ته سفر وکړي، ترڅو د افغانستان او پاکستان ترمنځ د داسې یو تړون لپاره هڅه وکړي چې له مخې یې دواړه هېوادونه اجازه ورنه کړي چې خاوره یې د داسې ډلو یا افرادو له خوا وکارول شي چې د یو بل امنیت ته ګواښ پېښوي.»
خلیلزاد د راپورونو په حواله داهم ویلي چې د ترکیې په کوربه توب د افغانستان او پاکستان ترمنځ د شخړو مخنیوي او سرغړونو ته د رسېدنې لپاره به د څار یو دفترهم جوړ شي.
د دې ترڅنګ، د هېواد پخواني ولسمشر حامد کرزي هم په خوست، کونړ او پکتیکا کې د عامو خلکو په نښه کول د پاکستان پوځي رژیم د هغو تخریبي او دښمنانه پالیسیو برخه ګڼلې چې په مکرره توګه یې کارولي دي.
کرزي پاکستاني رژیم ته خبرداری ورکړی چې له داسې چلن لاس پر سر شي او د دغو تېریو پایلې دې په پام کې ونیسي.
د افغانستان پخواني ولسمشر حامد کرزي ویلي: « له پاکستان غواړم چې له افغانستان سره پر بین المللي اصولو او د ښه ګاونډيتوب پر بنا اړیکې خپلې کړي. عاقبت اندېشي دې وکړي او د تخریبي او دښمنانه پالیسیو له تکرارولو دې ډډه وکړي.»
دغه راز، د جمهوری حکومت ملي روغې جوړې عالي شورا رییس ډاکټر عبدالله عبدالله هم دغه بریدونه غندلي او د سولې او ډېپلوسۍ له لارې یې د ترینګلتیاوو پر حل ټینګار کړی.
عبدالله عبدالله زیاته کړې: « د پاکستان له لوري د افغانستان د هوايي حریم نقضول، پر خوست، پکتیکا او کونړ د پاکستان هوايي بریدونه او په کې د ملکي وګړو هدف ګرځول غندو. هر ډول پوځي تحرکات او بریدونه د حل لاره نه ده بلکې د ثبات د تامین او د ستونزو حل اساسي لاره خبرې اترې دي چې باید په لومړیتوب کې ونیول شي.»
له دې غبرګونونو سربېره، په کوردننه ګڼو مطرحو څېرو او سیاستوالو هم په کونړ ، خوست او پکتیکا کې تېره شپه د پاکستاني رژیم هوايي بریدونه غندلي او اسلام اباد یې په سیمه کې د بې ثباتۍ رامنځته کولو لپاره د لوېدیځو هېوادونو پروژه بللې.
له دې بمباریو سره د پاکستان پوځي رژیم د اوربند د دوام لپاره د قطر او ترکیې په منځګړیتوب کړې ژمنه هم ماته کړه.
