د افغانستان اسلامي امارت د کابینې ۲۰مه ناسته د سه شبنې پر ورځ د « ۱۴۰۰ کال د سلواغې پر ۵ مه» د رئیس الوزراء ملا محمد حسن خوند پر مشرۍ جوړه شوه.
ناسته کې د غیر دولتي مؤسساتو یا انجوګانو له خوا د بشري مرستو د توزیع، او ملي پراختیا شرکت په اړه د ټاکل شویو پلاوو له خوا چمتو شوې طرحې له څېړنې وروسته تصویب شوې.
کابینې د چارو ادارې عمومي ریاست، د مالیې وزارت، د معادن او صنایعو وزارت او د ملي پراختیا شرکت له استازو جوړ شوي پلاوي ته دنده وسپارله ،چې د ملي پراختیا شرکت د نیمګړو پروژو د تکمیل لپاره د مالي منبع پیدا کولو په اړه څېړنه وکړي، تر څو د یادو پروژو پاتې چارې بشپړې شي.
کابینې پرېکړه وکړه،چې ټولې دولتي ادارې مکلفې دي، تر څو د برېښنا شرکت هغه قرضونه اداء کړي،چې د اسلامي امارت له خوا د کابل له فتحې وروسته اضافه شوي دي.
د ملا حسن اخوند پر مشرۍ دې ناسته کې د عشر او زکات راټولولو د ادارې د تأسیس، د بشري مرستو په برخه کې د شفافیت او نورو موضوعاتو په اړه هم بحثونه او پریکړې وشوې.
