Skip to content
ځايي چارواکي وايي، د اوس لپاره یې ۹۵۰۰ غربت ځپلو کورنیو ته د هند له لوري د مرسته شویو غنمو د وېش لړۍ پیل کړې ده.
د یاد ولایت مقام استازی حافظ خالد وايي، د غنمو دغه مرستې وچکالۍ او د جګړو ځپلو کورنیو لپاره ځانګړې شوي دي.
خالد وايي، د مرستو په دغه لړۍ کې هرې کورنۍ ته ۱۰۰کیلو غنم ورکول کېږي، خو د په خبره یې هڅه کوي اړمنو ته لا زیاتې مرستې ورسوي.
هغه زیاته کړه:« د دغو کورنیو ډېره برخه د سخت غربت تر څنګ جګړو او وچکالۍ ځپلي دي. موږ اوس دوی ته د هند له لورې مرسته شوي غنم وېشو،خو د راتلونکي لپاره به د بې وزلو کورنیو لپاره داسې پروژې هم عملي کړو، چې غربت ځپلي کورنۍ خپل اقتصاد خپله جوړ کړي.»
د دغو مرستو د وېش په لومړۍ ورځ سلګونه غربت ځپلې کورنۍ د مرستو تر لاسه کولو لپاره راټولې شوې وې.
دوی ورسره شویو مرستو مننه کوي، خو تر څنګ یې د ورته مرستو د زیاتېدو غوښتنه کوي.
اروزګان اوسېدونکی محمد ولي وايي:« موږ ډېر خوشاله یوو. دوې بوجۍ غنم مې تر لاسه کړل، خو هېله مو داده، چې دغه مرستې نورې هم ډېرې شي.»
تر دې وړاندې اسلامي امارت د لومړي وزیر مرستیال مولوي عبدالسلام حنفي د بشري مرستو له ادارو سره د همغږۍ په ناسته کې ویلي وو، بېړنۍ مرستې د افغانستان بشري ناورین لپاره اغېزمنه چاره نه ده او نړیواله ټولنه باید دغه هېواد کې د اوږد مهالو اقتصادي پروژو لپاره کار وکړي.
