د افغانستان بهرنیو چارو وزیر یو ځل بیا له افغان کډوالو سره پر ناوړه چلن انتقاد کړی او وايي، ځینې هېوادونه د سیاسي ملحوظاتو له کبله د افغان کډوالو په وړاندې غیر انساني او د نړیوالو اصولو خلاف چلن کوي.
مولوي امیر خان متقي د سې شنبې په ورځ په کابل کې د افغانستان د سکټوري وزارتونو او ملګرو ملتونو اړوندو ادارو ترمنځ د همغږۍ پنځمې غونډې ته خبرو کې پاکستان ته په اشارې دا څرګندونې کړې دي.
که څه هم متقي د کوم هېواد نوم نه دی یاد کړی، خو د کابل او اسلام اباد ترمنځ د اړیکو له ترینګلتیا وروسته، پاکستاني چارواکو د افغان کډوالو اجباري ایستلو ته زور ورکړی.
د بهرنیو چارو وزیر امیرخان متقي زیاته کړې: « بل مثال یې افغان مهاجرینو سره د سیاسي ملحوظاتو له امله د ځینو هېوادونو غیر انساني رویه ده. د ژمي په دې یخ موسم کې له یوې خوا په زور د کورونو پرېښودلو ته اړ کېږي او له بلې خوا ورته په کرښه دروازه تړي او د تګ اجازه نه ورکوي. آیا دا د کډوالو له نړیوالو اصولو څخه ښکاره سرغړونه نه ده؟ آیا دا د ښځو، ماشومانو او سپین ږیرو په حق کې غټه بې انصافي نه ده؟»
د بهرنیو چارو وزیر همدارنګه زياته کړې چې په افغانستان کې باید مرستې په داسې ډول ولګول شي چې په اوږد مهال کې د خلکو او هېواد په اقتصادي وده کې رغنده رول ولري.
نوموړي د نړیوالو له خوا د کېدونکو بشري مرستو هرکلی کړی، خو زیاتوي چې بشري مرستې نور باید په بنسټیزو برخو کې ولګول شي، ترڅو په اوږد مهال کې افغانان په خپلو پښو ودرېږي.
د بهرنیو چارو وزیر په دې اړه ویلي: « بشري مرستې په لنډمهال کې د خلکو عاجلې اړتیاوې پوره کوي، خو په اوږده مهال کې بیا اړمن خلک داسې لاسنیوي ته اړتیا لري چې پر خپلو پښو ودرېږي؛ ځکه نو موږ باید د اوږده مهال لپاره د اړمنو لاسنیوی وکړو او د دې زمینه برابره کړو چې دوی په خپلو پښو ودرېږي او له فرصتونو ډک راتلونکی ولري. دا هغه وخت ممکنه ده چې په زېربنا، بیارغونې، حیاتي پروژو او د خصوصي سکټور پر پیاوړتیا تمرکز وشي.»
همدارنګه امیرخان متقي ویلي، د اسلامي امارت حکومت له تېرو څلورو کلونو راهیسې هڅه کوي چې هېواد له هره اړخه په پښو ودروي. د نوموړي په خبره، اسلامي امارت د تېرو څلورو لسیزو جګړو له اغېزو د وتو لپاره د نړیوالو مرستو ته اړتیا لري، خو د ده په خبره، نړیوال بشري مرستې له سیاسي مسایلو سره تړي.
د بهرنیو چارو وزیر امیرخان متقي په دې اړه ویلي: « د دې یادونه هم اړینه ده چې یادو ننګونو ته د رسېدنې په موخه کافي نړیوالې مرستې نه دي رسېدلې او سیاسي موضوعات له بشري موضوعاتو سره تړل کېږي. دغه کار د مرستې او همکارۍ پروسې ته زیان رسوي. د افغانستان اسلامي امارت په ټول افغانستان کې بشري مرستو ته لاسرسی ممکن کړی او دا یې پالیسي ده چې بشري مرستې باید له سیاست سره ونه تړل شي.»
د بهرنیو چارو وزیر همدارنګه له نړۍ غوښتنه کړې چې بشري مرستې باید له سیاسي ملحوظاتو سره و نه تړي او د اسلامي امارت چارواکو ته په هغو ناستو کې د ګډون بلنه ورکړي چې په بېلابېلو هېوادونو کې د بشري موضوعاتو اړوند ترسره کېږي.
