جلال اباد ښار چې د زیات نفوس له امله يې ښاري نظم او ښکلا زیانمنه شوې، دغه راز د ورښتونو پر مهال د دې ښار سړکونه له اوبو ډک او خلک په کې په اسانۍ تګ راتګ نه شي کولی.
تازه د یادې ستونزې د حل لپاره د جلال اباد ښاروالۍ د تلاشۍ له څلور لارې تر شیشم باغ پورې د کانال یا ویالو جوړولو چارې پيل کړې.
د مسوولینو په خبره، دا ویالې د ۱۵.۸ میلیونه افغانیو په لګښت، د ۱۲۱۶ مترو په اوږدوالي او ۱.۳ مترو پلنوالي سره جوړېږي.
د جلال اباد ښاروال بسم الله بلال وايي: « د دې کانال اوږدوالی ۱ زر ۲۱۶ متره او عرض یې ۱۳۰ سانتي متره دی. دا پروژه د جلال اباد ښار د تلاشۍ له چوک څخه پیل تر شیشم باغ پورې غځېږي. همدارنګه یوه بله پروژه هم لرو چې انشاالله په لنډ وخت به یې کار پیل شي او اوبه به له ښاره د باندې وباسي.»
محلي مسوولین ډاډ ورکوي چې د دې ویالو په جوړېدو سره به د بارانونو پر مهال پرسړکونو اوبه نه ډنډېږي او نه به هم ښاریان او هټۍ وال له ستونزو سره مخ کېږي.
د جلال اباد ښاروالۍ د تخنیکي او سکټوري چارو رییس انجینر وحید الله مخلص وايي: « د بارانونو پرمهال اکثریت د تلاشۍ په چوک کې اوبه ډنډېږي او د سړک د تخریب ترڅنګ د خلکو لپاره د ستونزو سبب کېږي. د دې پروژې په پلي کېدو سره به دا ستونزې هوارې شي او اوبه به عمومي جر ته انتقال شي.»
په ورته مهال، ښاریان د دې ښار په نورو سیمو کې هم د ورته ویالو او د کانالونو د جوړولو غوښتنه کوي.
د جلال اباد اوسېدونکی امرالله وايي: « له تلاشۍ چوک څخه تر قول اردو پورې ساحې خلک ډېر له اوبو په تکلیف دي. موږ به د ناحیې له آمر او وکیلانو سره یوځای د شپې راوتلو او د اوبو په ایستلو کې به مو مرسته کوله، ترڅو د خلکو کورونه او هټۍ تخریب نه کړي. تمه لرو چې د دې پروژې سره سطحي اوبه انتقال شي.»
د جلال اباد اوسېدونکی رحمت الله وايي: « په دې کانال سره زموږ مشکل سل په سلو کې نه حل کېږي بلکې یوه بل کانال ته په مخابراتو چوک او بل کانال ته هم د پوهنتون له شفاخانې سره اړتیا ده. ترڅو د ښار ټولې اوبه سیند ته وباسي. کله چې باران وشي، د مخابراتو چوک کې خلک نه شي تېرېدلی.»
جلال اباد ښار چې اوسمهال په کې تر پخوا څو چنده ډېر خلک اوسیږي، منظم کانالیزاسیون نه لري او د ورښتونو پر مهال اوبه د خلکو کورونو او هټیو ته پورته کیږي چې له امله یې خلکو ته مالي زیانونه اوړي.
