ګوترس له افغانستان سر د بشري مرستو د دوام ژمنه وکړه او زیاته یې کړه،چې دغه مرستې د افغان ولس لپاره کوي.
ګوتېرس وویل، له اسلامي امارت سره د ملګرو ملتونو د اړیکو موخه داده،چې ښځو ته حقونه ورکړل شي او د دغې غوښتنې په پوره کیدو به نیوکې هم پای ته ورسیږي.
ګوترس زیاتوي:«دا ښکاره ده،چې اوس مهال په افغانستان کې ډېر جدي وضعیت دی او له بېلابېلو حقونو سرغړونه کېږي. له اسلامي امارت سره په اړیکو کې زموږ موخه هم دا ده، چې ښځو او انجونو ته د کار او زدکړو فرصت ورکړل شي او منځنیو او لوړو زدکړو ته زمینه برابره شي او هغوی کار ته پریښودل شي.»
ګوترس زیاته کړه،چې د ملګروملتونو دغه موخې تر اوسه په بشپړه توګه نه دي پلې شوي،خو پرمختګونه شوي او د ملګروملتونو ښځینه کارکوونکو ته د کار اجازه ورکړل شوې.
هغه پخپلو خبرو کې ټینګار وکړ،چې د اسلامي امارت په رسمیت پیژندلو کړکیچ تر هغې نه حل کیږي، چې هغوی د ښځو او بشر حقونو ته درناوی نه وي کړی.
ګوترس زیاتوي:«د طالبانو لپاره دا ډېره اړینه ده،چې په رسمیت پیژندل کیدو لپاره او د نړیوال ملاتړ لپاره د ښځو او نجونو حقونو ته درناوی وکړي او په ټوله کې د بشر حقونه له پامه ونه غورځوي.»
ګوترس زیاتوي:« دا به ډېر ستره تېروتنه وي،چې افغان ولس ته د دې لپاره په ټولییزه توګه جزا ورکړل شي. چې حاکمیت له داسې چا سره دی،چې قوانینو ته ژمن نه دي او چلن یې له خلکو سره ناسم دی.»
ګوترس وویل، سیاسي مسایل او بشري مرستې دوه جلا قضیې دي او دوی نه غواړي،چې یو د بل قرباني کړي او له افغان ولس سره به د مرستو په برخه کې د هغوی ژمنتیا دوام پیدا کړي.
