د پاکستان پوځي رژیم له لوري په خیبرپښتونخوا کې د پښتنو د وژنې، ښوونځیو او جوماتونو د ړنګولو په لړ کې د پښتون ژغورنې غورځنګ مشر یو ځل بیا پر دې رژیم سختې نیوکې کړې دي.
منظوراحمد پښتین وایي، د پاکستان پوځ د پښتنو وینو پر تویولو روږدی شوی او یوه شېبه هم ترې نه غلی کېږي. پښتین نیوکه کړې چې د پاکستان پوځي رژیم هره ورځ د ډالرو لپاره د بې ګناه خلکو وینې تویوي.
هغه دا غبرګون د پاکستان پوځي رژیم له خوا د يکشنبې په ورځ ناوخته د اورکرزیو په ډبوري سیمه کې د يوه عام کس له وژلو وروسته ښودلی.
د پښتون ژغورنې غورځنګ مشر منظور احمد پښتین وايي: « پاکستان د پښتنو وینې تویول اوس د داسې نشې په شان عادت جوړ شوی چې یو ساعت هم ترې نه غلی کېږي. هره ورځ د پښتنو په وینو خپله ډالريزه نشه پوره کوي. نن یو ځل بیا په جلندري ترانې مستو پوځونو د پښتنو په اورکزيو ډبوري سیمې مارټر ګولۍ ویشتلې دي چې په پایله کې یې یو بې ګناه اورکزی پښتون شهید شوی او بل زخمي دی.»
د پښتون ژغورنې غورځنګ مشر همدارنګه پر هغو سیاستوالو او رسنیو هم سختې نیوکې کړې چې د بې ګناه ولسي خلکو پر وژنو غلي، خو د پاکستان ملي سرود ته د یو څو کسانو پر نه ودرېدو یې توند غبرګونونه ښودلي وو.
د منظور پښتین په خبره، هغوی ته د پښتنو۸۰ زره بېګناه ولسي خلکو وژل او نور جبر و ظلم عادي، خو د جلندري سرود ته په ناستې غوسه او د خفګان بیانونه ورکول.
منظور احمد پښتین زیاته کړې: « د جلندري سرود یوازې په ناستې اورېدو باندې چېرسنيو او سیاست مدارانو څومره غوسه ښکاره کړه، ایا دوی دا جرئت هم لري چې د یو پښتون په داسې بې رحمانه وژلو هم هغه ډول غصه، خفګان، بیانونه ورکړي؟ د دوی لپاره د اتیا زره تشلاس بېګناه پښتنو وژنه په سخت ظلم، جبر، بې رحمۍ او بې وسۍ کې هېڅ اهمیت نه لري، خو د یو پنجابي شاعر د ترانې درې بیتونه ورته تر دې ډېر زیات مهم دي.»
د پښتون ژغورنې غورځنګ مشر همدارنګه د نړۍ په لر و بر کې پر پښتنو غږ کړی چې د پاکستان پوځي رژیم د ظلم و زیاتي پر وړاندې غلي پاتې نه شي او د خپل مظلوم ولس ترڅنګ ودرېږي.
د چارو څارونکي بیا وایي، د پاکستان پوځي رژیم له کلونو راهیسې هڅه کوي چې د پښتنو ولسي خلک د ترهګرۍ په نامه وژني او خپلې ډالریزې پروژې پرې پلې کړي.
د پوهنتون استاد فیض محمد ځلاند وايي: « له بده مرغه په پاکستان کې له تېرو پنځو شپږو لسیزو راهیسې د پښتنو ژوند تریخ دی او د بلوڅانو غوندې پر دوی هم بې درېغه ظلمونه کېږي. د دوی مشران ترور کېږي او ځینې یې حتا په زندانونو کې زړېږي او اجازه نه ورکول کېږي چې د خپلو خلکو د بشري او انساني حقونو د ملاتړ لپاره غږ پورته کړي.»
د پښتون ژغورنې غورځنګ مشر تېره ورځ هم د پاکستان پر پوځي رژیم نیوکه کړې وه چې هره ورځ په خیبرپښتونخوا کې د دوی په لاس ولسي خلک قرباني کېږي. منظور پښتین ویلي و چې د پاکستان پوځي رژيم په خیبر پښتونخوا کې د ولسي بېګناه خلکو ترڅنګ جوماتونه او ښوونځي هم په نښه کوي.
په دې وروستیو کې د پاکستان پوځي رژیم په خیبرپښتونخوا کې د ولسي خلکو پر کورونو، جوماتونو او ښوونځیو د ترهګرۍ په نامه پوځي عملیات پیل کړي چې هره ورځ په کې ولسي خلک قربانۍ کېږي.
