ورته مهال اروپايي ټولنې په کابل کې د خپل دفتر له پرانېستلو وروسته ویلي، دغه دفتر یې د حد اقلي همکاريو او بشري مرستو رسولو په موخه پرانیستی او د رسمیت پیژندو په مانا نه دی.
د سیاسي چارو شنونکي وايي، اروپايي ټولنه او امریکا ګډ دریځ لري او د افغانستان پهتړاو د دوی اوسنی دریځ له فشار ډک دی،خو کله نا کله پر نرمښت بدلیږي.
دوی ټینګار کوي،چې اوس اسلامي امارت باید خپله څرګنده پالیسي اعلان کړي،ترڅو دا اړیکې مبهمې پاتې نه شي.
شنونکی نورالله حضرتي وايي:«هغه څه چې اوس اسلامي امارت ته پکار دي، هغه دا دي چې باید داسې یوه څرګنده پالیسي د نړیوالو اړیکو په تړاو وړاندې کړي چې له امریکا او اروپا سره یې په اړیکو کې مبهم څه پاتې نه شي او دوی خپله پالیسي ډیره روښانه کړي.»
خو یو شمیر نور بای په دې اند دي،چې د ډيپلوماسۍ له پلوه په یوه هېواد کې د استازولۍ دفتر پرانېستل نیمه رسمیت پیژندل دي او تر شاه یې پټ تعاملات موجود دي.
شنونکی بلال فاطمي وايي:« دا چې دوی دلته دفتر پرانیزي او اروپايي ټولنې له دفتر پرانېستلو وروسته ویلي،چې د رسمیت پیژندلو په مانا نه ده. دا د دویمې سطحې ډيپلوماسۍ له مخې دا د رسمیت پیژندلو په مانا ده،ځکه دوی چې هر ډول مراودې کوي او له حقوقي پلوه به یې ټول فعالیتونه او اړیکې له بهرنیو چارو وزارت سره وي.»
اخوا اسلامي امارت بیا د خپلې واکمنۍ له پیل راهیسې له نړیوالو سره پر ښو اړیکو لرلو او اقتصادي راکړې ورکړې ټینګار کړی او اوس هم د دغو ډيپلوماټیکو اړیکو د پراختیا په لټه او غوښتوونکي یې دي.
