Skip to content
اروپایي ټولنه وايي، افغانستان کې د ژوند،زده کړو، روغتیا، کډوالو، پناه غوښتونکو او کورنیو بې ځایه شویو، ملاتړ لپاره د ۲۶۸ اعشاریه درې میلیونه ایرو په ارزښت پروژې پلې کوي.
د اروپايي ټولنې په خبره، دا پروژې به د د ملګرو ملتونو پراختیایي پروګرام، د کوچنیانو ملاتړ صندوق، د خوړو نړیوال پروګرام، کډوالۍ پروګرام، روغتیا نړیوال سازمان او د پناه غوښتونکو لپاره د نړیوالې ادارې له لارې پلي کیږي.
اروپایي ټولنه:« په داسې حال کې چې، افغانستان کې بشري وضعیت په خورا بد حالت کې دی، اروپایي ټولنې د ۲۶۸.۳ میلیونه ایرو په ارزښت پروژې اعلان کړې، د اروپایي ټولنې تمرکز د ژوند په خوندېتوب، زده کړو، روغتیا، کډوالو، پناه غوښتونکو او داخلي بې ځایه شویو، پر ملاتړ دی. دا پروژې د ملګرو ملتونو پراختیایي پروګرام،د ماشومانو ملاتړ صندوق،د خوړو نړیوال پروګرام،د کډوالۍ پروګرام، روغتیا نړیوال سازمان او د پناه غوښتونکو لپاره د نړیوالې ادارې له لارې پلي کیږي،چې افغانان به ترې په مستقیم ډول ګټه واخلي.»
اروپایې ټولنې دا هم واضح کړې،چې څومره پیسې به د کومې ادارې له لورې د کومې برخې د ملاتړ لپاره لګول کېږي.
اروپايي ټولنه وايي:« د یونېسف له لورې د ۱۹۴زره دولتي ښوونکو ته به هره میاشت ۹۰ ایرو ورکړل شي. دا به د ژمي په دوو میاشتو کې ورکړل شي. له دې به په غیر مستقیم ډول ۸ اعشاریه ۸ میلیونه ماشومان د زده کړو په برخه کې مستفید شي. د ماشومانو د خوارځواکۍ او د ښځو د روغتیا لپاره به ۲۵ میلیونه ایرو ولګول شي. د روغتیا نړیوال سازمان له لورې به ۱۰ میلیونه ایرو، د کویډ – ۱۹ پر وړاندې د مبارزې په برخه کې ولګول شي.له پولیو سره د مبارزې لپاره به د روغتیا نړیوال سازمان او یونېسف له لارې ۲۵ میلیونه ایرو لګول شي.»
له دې سربېره اروپایي ټولنه به له ۴۵۰ زره کسانو سره د غذایي خوندېتوب په موخه د خوړو او نغدي مرسته وکړي.
اروپایي ټولنه وایې، د ملګرو ملتونو د ادارو له لارې به ۷۹ میلیونه ایرو،پر زور بې ځایه شویو کسانو د ملاتړ لپاره ولګول شي، چې په افغانستان، ایران، پاکستان او منځنۍ اسیا کې دي.
