د خوست ولایتي مسوولینو او ځایي ځوانانو ترمنځ د دې ولایت په اطلاعاتو او فرهنګ ریاست کې ناسته وشوه. دا ناسته د ولایت د اطلاعاتو او فرهنګ ریاست په هڅو را بلل شوې وه او په کې د دې ولایت د بېلابېلو ولسوالیو او مرکز په ګډون لسګونو ځوانانو برخه درلوده.
په ناسته کې ځوانانو له حکومت وغوښتل چې په دې ولایت کې اساسي رغنیزو او اقتصادي پروژو پلي کېدو ته زمینه برابره کړي او د حکومت په اډانه کې د ځوانانو رول ته هم اهمیت ورکړل شي.
د خوست اوسېدونکی رشید الله همدرد وايي: « زموږ له ځوانانو سره ډېره انرژي ده، که د دوی له انرژۍ څخه د وطن په آبادولو او په ټولنه کې د شته نفرتونو له منځه وړلو لپاره کار واخیستل شي، دوی ډېر څه کولی شي.»
د خوست اوسېدونکی قیام مندوزی وايي: « په ولسوالیو او اطرافونو کې باید ځینې پروژې پر ځوانانو پلې شي، ځینې مسوولیتونه او کارونه ځوانانو ته وسپارل شي، انشاالله پایله به یې ښه وي.»
د خوست اوسېدونکی سخي مرجان ویاند وايي: « په دولتي ادارو کې ځوانانو ته کار ورکول او په ځوانانو باور کول ډېر اهمیت لري. باید د ځوانانو له وړتیا څخه ګټه پورته کړو.»
ځايي چارواکو له ځوانانو سره دې ناسته کې ډاډ وښود چې د ځوانانو پر اهمیت باور لري او هڅه کوي چې د هېواد ابادۍ کې له ځوانانو سره ګډ کار وکړي.
خوست والي عبدالله مختار وايي: « د هېواد جوړولو زموږ او تاسو ګډ مسوولیت دی، افغانستان به بیا په اسلامي روحیه او واحد قیات جوړوو؛ داسې چې خپلواک او آزاد وي. د دې هدف لپاره باید ګډ ګام واخلو او زه په دې برخه کې له تاسو سره ملګری یم.»
خوست کې د ځایي مسوولینو او بېلابېلو سیمو د ځوانانو ترمنځ دا ناسته په شریکه د ستونزو د هواري، د خلکو او حکومت ترمنځ د ناسمو باورونو له منځه وړلو لپاره را بلل شوې وه. په دې ناسته کې ټینګار وشو چې باید د خلکو او حکومت ترمنځ د بې ځايه اختلافاتو په ځای، د یووالي، ورورولۍ او همکارۍ فضا رامنځته شي.
