د پاکستان دفاع وزیر خواجه اصف له پاکستاني رسنیو سره په خبرو کې ویلي، که ترکیه او قطر د خبرو بيا پیل لپاره هڅې وکړي، نو له دوی سره د ښو اړیکو په پام کې نیولو سره یې خبره پر ځمکه نه شي غورځولای او له افغانستان سره به بیا خبرې پيل کړي.
د پاکستان دفاع وزیر زیاته کړې: « له افغان طالبانو سره د بیاځل مذاکراتو امکان شته. ځکه د ترکیی حکومت او خلک یې زموږ خیر غوښتونکي دي او پاکستان یې خبره نه شي ردولای.»
تردې مخکې د ترکیې په استانبول ښار کې د افغانستان او پاکستان ترمنځ د موجوده لانجې د حل لپاره د خبرو درې پړاونه له کومې نتیجې پرته پای ته رسېدلي.
خواجه اصف له دې وړاندې خبردارې ورکړې و چې که چیرې دا مذاکرات ناکامه شول، نو دوی به په پاکستان کې د نا امنۍ د هرې پېښې په صورت کې جدي غبرګون وښيي.
د نوموړي له دې څرګندونو وړاندې ګڼو پاکستاني چارواکو د دواړو هېوادونو ترمنځ د موجوده ستونزو د حل لپاره پر مذاکراتو ټینګار کړی او دا یی د حل یوازینۍ لار بللې ده.
د سیاسي چارو شنونکی خلیلاحمد نادم وايي: « د ترکیې او قطر په څېر ځینې هېوادونه دېته نه ګوري چې پاکستان څه کوي، د دوی لوړ پوړي چارواکي پاکستان ته تللي، ترڅو پاکستان پوه کړي چې پر افغانستان له یرغل لاس واخلي او له ناوړه عواقبو یې خبر کړي.»
افغان شنونکي هم د ترکیی او قطر هڅې د کابل او اسلام اباد ترمنځ د را ولاړو شویو ستونزو د حل لپاره یو ښه فرصت بولي.
د دوی په باور، د دواړو هېوادونو ترمنځ د ستونزو حل نه یوازې له سیاسي اړخه بلکې له اقتصادي اړخه هم د افغانستان په ګټه دی.
خو له دې خوشبینۍ سره سره، دوی دا وړاندیز کوي چې کابل باید د مذاکراتو د تېرو درېیو پړاوو په څېر د اسلاماباد نامعقوله او نا اړوند غوښتنو پر وړاندې کلک او ثابت دریځ ولري او د ملي ګټو په نظر کې نیولو سره عمل وکړي.
د سیاسي چارو شنونکی فیض محمد ځلاند وايي: « ښه به وي چې موږ له ترکیې، قطر او پاکستان سره په څلور اړخیزو ناستو کې خپل ملي دريځ او ملي ګټې لا ټینګ ونیسو او وکولی شو پاکستان وهڅوو چې له موږ سره خپله ستونزه او کشاله حل کړي. د ترکیې او قطر منځګړیتوب ښه فرصت دی، د دې دواړو هېوادونو په منځګړیتوب کولی شو د افغانستان او پاکستان ترمنځ شته توپیر راکم کړو.»
د پاکستان دفاع وزیر خواجه محمد اصف داسې مهال له افغانستان سره د خبرو د بیا پيل د امکان په تړاو خبرې کوي چې په همدې اوونۍ کې د ترکیې ولسمشر رجب طیب اردوغان د دواړو هېوادونو ترمنځ منځګړیتوب ته چمتووالی ښودلی.
