د افغانستان بیان ازادۍ کور د اسلامي امارت له پنځه میاشتني حاکمیت لاندې د رسنیو او خبریالانو د وضعیت په تړاو اعلامیه خپره کړې ده.
خبرپاڼه کې د افغان خبریالانو په کار او ژوند اندېښنه ښودل شوې او له حکومتي مشرانو غوښتنه شوې ده،چې د خبریالانو پر وړاندې ستونزې او خنډونه نه رامځنته کوي.
په خبرپاڼه کې وړاندې راغلي، له دې امله ګڼو خبریالانو دندې پریښي، ځینو ته رواني ستونزې پیدا شوي او هغوی،چې دندو ته ځي له ګواښ سره مخ دي.
د خبرپاڼې یوه برخه:« د افغانستان رسنۍ او خبریالان په بې سارې ډول د اسلامي امارت تر فشار لاندې دي،چې په بېلا بېلو ډولونو خبریالان او رسنۍ تر فشار لاندې راولي. سانسوروي یې او هڅه کوي، د افغانستان ټولې ازادې رسنۍ پر خپل تبلیغاتي وسیله بدلې کړي،چې په دې برخه کې تر یوې کچې بریالي شوي هم دي، ځکه له بېلا بېلو لارو لکه زور، ګواښ او فشار استفاده کوي.»
د بیان ازادۍ کور همدا راز په خپله خبرپاڼه کې ویلي، اسلامي امارت د راپورونو، مرکې او یا بحثونو وروسته،چې د دوی په خوښه نه وي، ژورنالیستان او خبریالان د ټیلیفون له لارې ګواښلي او ډارولي دي.
د خبرپاڼې یوه برخه:« له همدې امله یو شمېر هغو تکړه خبریالانو،چې تر اوسه پورې افغانستان کې پاتې دي او د بیان ازادي یې سره کرښه ده،دندې پرېیښي او کور کې په پټه ژوند کوي. د دوی له ډلې یو شمېر کسان پر رواني ناروغیو اخته شوي او ځنې نور چې هره ورځ کار او دندو ته ځي،هره شېبه له خطر سره مخ دي.»
د بیان ازادۍ کور د اسلاميامارت له مشرانو غوښتي،د بیان ازادي،چې د شلو کالو مهمه لاسته راوړنه ده او پرته له رسنیو ښه حکومتولي نه شي کیدای،باید درناوی ورته ولري او له ملاتړ سربیره ورسره همکاري وکړي.
د خبرپاڼې یوه برخه:« د بیان ازادۍ کور د اسلامي امارت له مشرانو غواړي،چې د خپلو کسانو د خپل سریو مخه ونیسي او د خبریالانو د نارضایتۍ او په هېواد کې د بیان ازادۍ د ډېر محدودیت لامل نه شي.»
د بیان ازادۍ کور له نړیوالې ټولنې هم په په دې برخه کې د جدي پاملرنې غوښتنه کړې ده.
د اسلاميامارت د ویاند مرستیال انعامالله سمنګاني سره مو دغه موضوع شریکه کړه،خو نظر یې شریک نه کړ.
خو له دې وړاندې اسلاميامارت ویلي، د بیان ازادۍ ته ژمن دي او ملاتړ یې کوي.
دبیان ازادۍ کور داسې مهال دغه خبرپاڼه خپروي،چې په تیرو پنځه میاشتو کې لسګونه تصویري، غږیزې او چاپي رسنۍ د اقتصادي او نورو ستونزو له کبله تړل شوي او د رسنیو سلګونه کارکوونکو او خبریالانو خپلې دندې له لاسه ورکړې دي.
