د پښتونخوا عوامي ملي ګوند مشر محمود خان اڅکزي په مشرۍ د پاکستان د حکومت اوپوزیسيون د لومړي ځل لپاره د افغانستان په باب د دې هېواد پاليسۍ ننګولې دي.
اڅکزي د افغانستان په وړاندې د مسلم ليګ نواز ګوند په مشرۍ د پاکستان ایتلافي حکومت اوسنۍ پالیسي بریټانوي امپراتورۍ ته ورته استعماري بللې ده.
د ده په خبره، که اسلام اباد په خپله پالیسۍ کې بدلون را نه ولي، له افغانستان سره د اړیکو د ښه کېدو تمه نه شي کېدای.
د پاکستان د حکومت اپوزیسيون مشر محمود خان اڅکزی وايي: « د پاکستان اوسني چارواکي د انګرېزانو په پله قدم ږدي او له افغانستان څخه درې غوښتې مطرح لري. د رسمي پولې په توګه د ډیورند فرضي کرښې منل، د افغانستان پر بهرني سياست اغېز لرل او د پاکستان تر کنټرول لاندې د کابل مرکزي حکومت فعالیت. دا ناپوهه او نااهل خلک ان د دوستانو د جوړولو په هنر هم نه پوهېږي.»
د ډېورنډ فرضي کرښې پر سر د افغانستان او پاکستان اختلافات اوږده مخينه لري او دا لانجه د دواړو هېوادونو ترمنځ د بې باورۍ، سیاسي او امنیتي کړکېچونو لامل ګرځېدلي چې د شنونکو په باور، پاکستان له همدې امله په افغانستان کې د باثباته نظام د رامنځته کولو په وړاندې خنډونه جوړوي.
د سیاسي چارو شنونکی شهزاده مسعود وايي: « که ریښتیا هم د پاکستان حکومت دا غوښتنې کړې وي، دا نامشروع غوښتنې دي، خوب او خیال دی. د افغانستان ملت پخوا هم دغسې غوښتنې رد کړې وې، اوس یې هم په شدت سره ردوي. افغانستان یو خپلواک هېواد دی او پاکستان باید په خپله پالیسۍ کې بدلون راولي. موږ غواړو د یوه ګاونډي په توګه له دوی سره متمدنه اړیکه ولرو، خو په دې ډول غوښتنو او څرګندونو سره دا اړیکې نورې هم د خرابۍ خواته ځي.»
ځينې نور شنونکي بیا د ډيورنډ کرښې په اړه پرېکړه د دولتونو نه بلکې د ولسونو واک بولي. د دوی په وینا، د اوس لپاره د دواړو هېوادونو ترمنځ د اړیکو عادي کېدل د افغانستان په وړاندې د پاکستان په موجوده سیاست کې په نرمښت پورې تړاو لري.
د نړیوالو اړیکو شنونکی سمیر انګار وايي: « منځنګړي هېوادونه قطر او تورکیه هڅه کوي چې د افغانستان او پاکستان ترمنځ د باور فضا رامنځته کړي او خبرې له اقتصادي چوکاټ څخه د سیاسي تعامل خواته یوسي.»
د پوځي چارو شنونکی اسدالله ندیم وايي: « افغانستان او پاکستان نه باید جګړې ته لاړ شي او یو طرف هم دغې جګړې او نیښتو ته اړتیا نه لري. که دا ډول اړیکې او یا جګړې ادامه پیدا کوي، د دواړو هېوادونو خلک یې زیان ویني.»
له دې وړاندې وړاندې د خیبر پښونخوا د صوبایي اسمبلۍ غړي نثار باز هم ویلي وو چې پاکستان له نږدې نیمې پېړۍ راهیسې د افغانستان په چارو کې لاسوهنه کوي او په کې د خپل نفوذ پراخولو لپاره د افغانستان ضد عناصر او وسله والې ډلې تقويه کوي.
