د افغانستان بانک ویاند صابر مومند وايي،د افغانستان بانکي نظام له سقوط ژغورل شوی او د بېرته عادي کولو لپاره یې هڅې ګړندۍ کړي دي.
مومند وايي،هڅې روانې دي،ترڅو په هېواد کې د بانکونو پر وړاندې شته ستونزې حل کړي او هېوادوالو ته خدمات وړاندې کړي.
هغه زیاته کړه:« د افغانستان بانک بانکي نظام د څارونکي په توګه هېوادوالو ته ډاډ ورکوي،چي د افغانستان بانکي نظام د ښه والي پر لور روان دی. ډېر ژر به یې کړنې په عادي توګه پیل شي.»
په همدې حال کې یو شمېر سوداګر او افغان پانګوال نیوکه لري،چې لا هم بانکي سیستم له ګڼو ستونزو سره مخ دی او پر و ینا یې که دا وضعیت دوام وکړي،یو شمېر خصوصي بانکونه به سقوط وکړي.
سوداګر میرزا کټوازی وايي:« د افغانستان بانکونه اوس هم په بد حالت کي دي،ترڅو چي د نړیوالو له لوري کنګل شوي پیسې خوشي نه شي دا ستونزه به دوام ولري.»
ورته مهال د صنعت او سوداګرۍ خونه هم د افغانستان بانکي نظام له ستونزو او ننګونو ډک بولي او په باور یې د خلکو پروړاندې یې خپل اعتبار له لاسه ورکړی دی.
شنوازاده زیاته کړه:« د ملګروملتونو کومې مرستې چې د افغانستان بانکونو سره کېږي،نه شي کولای ستونزي یې حل کړي. د افغانستان بانکونه په بد اقتصادي حالت کې دي او ان خلکو خپل باور ورباندي له لاسه ورکړی دی.»
د افغانستان بانک مسوولین داسې مهال د بانکي سیستم بېرته عادي حالت ته د راګرځولو لپاره هڅې زیاتې کړي،چې له تېرو پنځو میاشتو راهیسې د افغانستان بانکي سیستم له ستونزو سره مخ دی،پر بانکي خدمتونو او پیسو اېستلو بندیزونه وضع شوي او تر اوسه پورې بانکي سیستم عادي حالت ته نه دی راګرځېدلی.
