اوس کارپوهان وایي، اسلامي امارت غواړي،سیمې ته ډاډ ورکړي او د نوې پالسۍ پر اساس ور سره مخ ته ولاړ شي.
د پوهنتون استاد فیض محمد ځلاند وايي:« طالبان په دې وروستیو کې کوښښ کوي،د سیمه ییزې ډیپلوماسۍ له لارې نه یوازې پر نړیوالو فشار راولي،بلکې بشري مرستو او د افغانستان اقتصادي ټیکاو لپاره نوې پالیسي خپله کړي.
طالب مشران کوښښ کوي،سیمې ته ډاډ ورکړي،چې ترهګرۍ په اړه به ګډ عمل کوي، بریدونه به کوي،د سیمه ییز تروریزم د مخنیوي لپاره.»
د بهرنیو چارو وزارت وایي، سیمې لپاره یې سیاست بریالی ده او افغانستان کولای شي، اوس په سیمه ییز اقتصادي اتصال کې مرکزي او محوري رول ولوبوي او په سیاسي لحاظ یې د پرمختګ ښکاره ټکي د دغو هېوادونو د سفارتونو پرانېستل او یو شمېر هېوادونو ته د استازو ټاکل دي.
بهرنیو چارو وزارت کې ډیپلوماټ ذاکر جلالي وايي:« زموږ باور دا ده،چې افغانستان کولای شي،په سیمه ییز اقتصادي اتصال کې مرکزي او محوري رول ولوبوي،ځکه چې له یوې خوا سرتاسري امنیت راغلی او له بل پلوه نوی حکومت ژمن او متعهد دی،چې د افغانستان له دغه ظرفیته به د هېواد د سولې او ثبات په اړه ګټه پورته کړي.
په سیاسي لحاظ افغانستان پرمختګونه کړي،د سیمې هېوادونو سفارتونه فعال دي او نوی حکومت توانېدلی، یو شمېر هېوادونو ته استازي وټاکي.»
په تېرو شلو کلونو کې د افغانستان بهرني او سیمه ییز سیاست تر ډېره امریکایي محوره وه، چې د کارپوهانو په باور د لودیځ او سیمې په اړه سیاستونه هغږي نه وه او بیلانس په ساتلو کې حکومت ناکام وه.
اوس به ولیدل شي،چې اسلامي امارت څومره بریالي کېږي،سیمه راښکیله کړي او افغانستان په ریښتیا هم د اتصال په برخه کې د عطف ټکی شي.
