د افغانستان خبریالانو ټولنې د رسنیو مسوول مسرور لطفي د یکشنبې پر ورځ د « ۱۴۰۰ کال د مرغومې پر ۲۶ مه» په کابل کې د یوه خبري کنفرانس پر مهال وویل، ښایي په افغانستان کې ډېری رسنۍ له دې امله سقوط وکړي،چې مالوماتو ته لاس رسی ورځ تر بلې محدود کېږي.
مسرور وايي، د رسنیو د فعالیت برخه کې د قانوني او حقوقي سند نه شتون لامل شوی دی،چې مالوماتو ته لاس رسی محدود شي.
هغه وايي، همدا لامل دی،چې ځینې وخت خبریالان د خبري پوښښ پر مهال له تاوتریخوالي سره مخ کېږي او ځېنې وخت د اسلامي امارت د مسوولینو ترمنځ سلسله مراتب هم نه مراعت کېږي.
مسرور وايي، دغې ټولنې د خبریالانو ترمنځ یوه ټولپوښتنه هم کړې،چې اتیا سلنه خبریالان له شته وضعیت ناراضه دي.
لطفي زیاته کړه:« جدي ستونزه د قانون نشتوالی دی،چې شخصي سلیقه یې رامنځته کړې او کله چې دا ستونزه حل شي، نو که کوم خبریال ته ستونزه پېښېږي موږ کولی شو،د قانون له مخې ستونزه حل کړو.»
دا په داسې حال کې ده،چې په تیرو دوه لسیزو کې افغانستان کې د رسنیو د فعالیت او مالوماتو ته د لاس رسي په موخه قانوني او حقوقي سند موجود و،چې له مخې، رسنیو فعالیت او دوام درلود، خو د اسلامي امارت په راتګ سره دغه قانوني او حقوقي سند تر اوسه نه شته دی.
