د پاکستاني مذاکراتي ټیم د همکاري نه کولو له امله د ترکيې په کوربه توب د افغانستان او پاکستان ترمنځ د مذاکراتو له ناکامېدو وروسته، د اسلامي امارت د حکومت وياند وضاحت ورکړ.
ذبيحالله مجاهد د مذاکراتو ناکامۍ عمده لامل د پاکستان په مرکچي پلاوي کې د همکارۍ روحيې نه موجوديت يادوي او زياتوي چې له افغان لوري يې تر خپل کنټرول لاندې سيمو کې د امنيت ټينګښت په اړه غير مسوولانه غوښتنې مطرح کولې.
د نوموړي په خبره، د مذاکراتو پرمهال د پاکستاني پلاوي ورته نامسووله چلن نه دا چې مطلوبې نتيجې ته رسېدل ستونزمن کړل، ترڅنګ يې دې هدف ته د رسېدو لپاره د منځګړو هېوادونو هڅې هم سبوتاژ کړې.
د اسلامي امارت ویاند ذبیح الله مجاهد وايي: « متأسفانه پاکستانی لوری د خبرو پرمهال د خپل امنیت په تړاو ټول مسوولیتونه د افغانستان حکومت ته راجع کول، په داسې حال کې چې له خپلې خوا یې نه د افغانستان د امنیت او نه هم د خپل امنیت په اړه د هېڅ ډول مسوولیت منلو ته تیار نه و. د پاکستاني پلاوي له خوا د غیر مسوولانه او نه همکارۍ روحیه، د دې لامل شوه چې د افغانستان اسلامي امارت له نېک نیت او د منځګړو له ټولو هڅو سربېره، کومې پایلې ته ونه رسېږو. د افغانستان اسلامي امارت یو ځل بیا پر خپل اصولي دریځ ټینګار کوي چې هېچا ته به اجازه نه ورکوي چې د افغانستان له خاورې څخه د بل هېواد په خلاف استفاده وکړي او نه به هم بل هېواد ته اجازه ورکړي چې له خپلې خاورې د افغانستان د ملي حاکمیت، خپلواکۍ او امنیت په ضد اقدامات او یا ملاتړ ترسره کړي.»
په ترکيه کې د مذاکراتو پرمهال داسې راپورونه خپاره شول چې پاکستان د تحريک طالبان پاکستان(ټيټيپي) په اړه له کابل د پرېکنده عمل غوښتنه کوي هغه څه چې کابل هرځل دا ستونزه د پاکستان اړوند بللې او څرګنده کړې يې ده چې په اړه يې مسووليت نه لري.
د حکومت ویاند ټيټيپي په قبايلي سيمو کې د پاکستان پوځ له لوري له عامو خلکو سره د روان ظلم محصول بولي، خو په خبره يې پر دې سربېره هم حکومت د ښه نيت له مخې هڅه کړې چې پاکستان ته له ټيټيپي سره د مذاکراتو تسهيلات برابر کړي؛ د مجاهد په خبره، د پاکستان پوځ برعکس دا لړۍ سبوتاژه کړه.
د اسلامي امارت ویاند په دې اړه وايي: « په پاکستان کې د سولې او امنیت لپاره مو د ټيټيپي او پاکستان د حکومت ترمنځ د مستقیمو مذاکراتو لپاره زمینه مساعده کړه چې له امله یې هغه مهال اوږدمهاله اوربند رامنځته شو او د خبرو اترو لړۍ هم روانه وه او د دواړو طرفونو ترمنځ ۹۵ سلنو پورې موضوعاتو باندې توافقات شوي وو او نږدې وه چې دا مسئله په پاکستان کې حل شي، خو متأسفانه د یوې خاصې پوځي کړۍ له خوا دغه وسایل ټول سبوتاژ شول. د ولس او خاورې دفاع د افغانستان اسلامي امارت شرعي وجیبه ګڼل کېږي او هر متجاوز پر وړاندې به د الله(ج) په مرسته او د خپل ولس په ملاتړ کلکه دفاع کوو.»
مجاهد که څه هم د کوم هېواد نه اخلي، خو ظاهراً اشاره یې پاکستان ته ده چې وايي د سيمې ناامنه کولو پروژه یې اخيستې ده. نوموړی دې ته په پام له ملګرو ملتونو او نورو هېوادونو غواړي چې د پاکستان د دې پروژو د پلي کېدو مخه ونيسي.
د اسلامي امارت ویاند ذبیحالله مجاهد زیاتوي: « موږ غواړو په هغو جریانونو ټوله سیمه خبره کړو چې دلته واقع کېږي. موږ د سیمې هېوادونه دېته متوجه کوو چې ځینیو کړیو له لویو قدرتونو پروژې اخیستې او غواړي سیمه نا امنه کړي. ایران، د منځنۍ اسیا هېوادونه، روسیه او نور هېوادونه باید د ستونزې حساسیت درک کړي او د دسیسو مخنیوي ته پاملرنه وکړي.»
بله خوا، د پاکستان دفاع وزير ويلي چې له افغانستان سره به ترهغې اوربند نافذ وي چې پر پاکستان بريد نه وي شوی، خو بيا د خبرداري په توګه د خپلې خاورې دفاع مشروع حق يادوي او زياتوي، په هر ډول حالت کې به له دې حق څخه استفاده کوي.
