له افغانستانه نورو هېوادونو ته د روزګار لپاره مخه؛ هېواد کې د بېوزلۍ او هر مهال د بېکارۍ کچې ډېروالي له امله شوې او ډېر شمېر ځوانانو پر مرګونو قاچاقي لارو بهر ته زړه ښه کړی.
که څه هم په کور دننه د کاري فرصتونو د ډېروالي او مسوولو ادارو له لوري د ځوانانو د را ګرځولو هڅه کېږي، خو تازه یو ځل بیا له مجبورې ورځې ایران ته د ځوانانو قچاقي تګ زیات شوی.
د فاریاب اوسېدونکی حفیظ الله وايي: « له مجبورۍ ځم ایران ته، تازه درې میاشتې کېږي چې راغلی یم، خو اوس مجبور یم چې بېرته لاړ شم؛ ځکه کور کې د خوراک څه نه لرو. د ایران پولیس مو وهي، حتا وژني مو؛ ما ولیدل چې خلک په غرونو کې مړه شوي وو. خو دلته کار نه شته او زه له اسلامي امارت غواړم چې خلکو ته د کار زمینه برابره کړي.»
د بادغیس اوسېدونکی ګل امین وايي: « په دې لاره تر ۴۵ ساعتونو پلې لاره ده، دا ټوله لاره په غرونو کې ده، ځینې کسان له لوږې او تندې مړه شوي. ما د ډېرو جنازې ولیدې چې په دښتو کې پاتې شوې؛ دا هرڅه له مجبورۍ کېږي.»
دوی دا مني چې قاچاقي لارې له مرګ، زندان او سپکاوي خالي نه دي، خو په کور دننه اوږدې بېروزګارۍ تنګ کړي. دوی هم غوښتنه کوي چې دلته دې ورته کاري فرصتونه پيدا شي.
د جوزجان اوسېدونکی عنایت الله وايي: « دلته کار نه شته، ما څو ځلې هڅه وکړه چې ایران ته لاړ شم، خو بېرته یې را وګرځولم. زه له اسلامي امارت غوښتنه کوم چې موږ ته د کار زمینه برابره کړي.»
د تخار اوسېدونکی عزیز احمد وايي: « زه د ایران پولیسو ونیولم او ډېر سخت یې ووهلم. د بېرته راشړلو پرمهال یې ۱۰ میلیون تومانه هم رانه واخیستل.»
بله خوا، د ۲۰۷ الفاروق قول اردو مسوولین وایي، تېره یوه میاشت کې یې له ایران سره په پوله د ۱ زر ۱۳۴ قاچاقي تلوونکو مخه نیولې.
د ۲۰۷ الفاروق قول اردو ویاند مجیب الله انصار وايي: « له هېواد څخه د باندې په غیر قانوني توګه د افرادو له انتقال څخه د مخنیوي ترڅنګ، د انساني قاچاقبرو پر وړاندې جدي اقدامات روان دي. امنیتي ځواکونه د سرحدي پولو ساتلو لپاره مېشت دي او اجازه نه ورکوي چې قاچاقبران نظم اخلال کړي.»
دا په داسي حال کې ده چې په کور دننه د اسلامي امارت مسوولینو څو ځله د بنسټیزو پروژو پیل او ځوانانو ته د کاري فرصتونو پر رامنځته کولو ټینګار کړی.
