دا په مارجې ولسوالۍ کې یو له هغو شپږو ښوونځیو دی چې د جوړولو چارې یې بشپړې او نور به زده کونکي په کې خپل لوست ته دوام ورکوي.
مسوولین وایي، دا ٦ ښوونځي د یونیسف په مالي ملاتړ د څه باندي٥٠ میلیونه افغانیو په لګښت په عصري او معیاري ډول جوړ شوي دي.
د دوی په خبره، په همدي جنوبي ولسوالیو کې د دوو نورو ښوونځیو لپاره هم د ودانیو جوړولو چارې بشپړېدو ته نږدې شوې دي.
د هلمند پوهني ریاست ویاند احسان الله الهام وايي: « د هلمند ولایت په جنوبي ولسوالیو کې اته ښوونځي وو چې له ډلې یې نن د شپږ بابو ودانۍ ګټه اخیستنې ته وسپارل شوې. دا ودانۍ په خانشین، مارجې، نادعلي، ګرشک او باباجي ولسوالیو کې د څه باندې ۵۰ میلیونه افغانیو په لګښت جوړ شوې. همدارنګه په ناوې او ګرمسېر ولسوالیو کې د دوو نورو ودانیو چارې یوڅه پاتې دي او په نږدې ورځو کې به ګټه اخیستنې ته وسپارل شي.»
د پروژې انجینر کلیم الله احمدي وايي: « په دې پروژه کې اته ښوونځي شامل دي چې په مختلفو ولسوالیو کې دي. له دې ډلې ۶ ښوونځي ګټه اخیستنې ته وسپارل شول او پاتې دوه نور به هم نږدې راتلونکي کې ګټه اخیستنې ته وسپارو. د دې ښوونځیو هره ودانۍ د ۶۰۰ تنو زده کوونکو ظرفیت لري.»
که څه هم دې ولسوالۍ کې بیارغنیزې چارې روانې دي، خو مسوولین يې وايې، په دې ولسوالۍ کې اوږدمهالې جګړې ډېر زیان اړولی او لا ډېرې پاملرنې ته اړتیا لري.
د مارجې ولسوالۍ د پوهني آمر احسان الله ثانوي وايي: « موږ له مسوولینو ډېر خوښ یو چې زموږ په ولسوالیو کې یې د ښوونځيو لپاره ودانۍ جوړې کړې. دا کار زموږ د عمومي زده کړو په برخه کې لوی ګام او لاسته راوړنه ده. زموږ نور ښوونځي هم ودانۍ نه لري او غوښتنه کوو چې نورې ودانۍ هم منظورې شي.»
د مارجې اوسېدونکي او زده کونکي هم د دې ښوونځیو رغول مهم بولي او په دې ولسوالۍ کې د لازیاتو پرمختیایي پروژو د پلي کولو غوښتنه کوي.
د مارجې ولسوالۍ اوسېدونکی سلطان محمد وايي: « ډېر خوښ یو چې دا ودانۍ جوړې شوې، خو بیا هم څه نا څه ستونزې لري. مثلا ً د ښوونځي ملازم تر څلورو بجو وي، موږ غوښتنه کوو چې د شپې هم پاتې شي. بله ستونزه دا ده چې اوبه نه لري، موږ غوښتنه کوو چې یوه برمه هم ورته ووهل شي، څوکۍ او مېزونه ورته چمتو شي.»
زده کوونکی بشیر احمد وايي: « موږ له دې وړاندې په کنډوالو کې سبقونه ویل او له لرې ځایونو به راتلو. اوس هم ودانۍ شته او هم نږدې شوه.»
د یادولو وړ ده چې وړاندې له دې هم د هلمند په ځینو شمالي ولسوالیو کې ١١ بابه ښونځیو ته نوې ودانۍ جوړې او ګټه اخیستنې ته سپارل شوې وي.
