Skip to content
د ملګرو ملتونو سرمنشي انټونیو ګوترس په نیویارک کې د یوه خبري کنفرانس پر مهال وویل، نړیواله ټولنه باید د افغانستان مرکزي بانک شتمني ازاده کړي،ترڅو د اقتصادي او ټولنیز نظام د راپرځېدو مخه ونیول شي.
ګوترس وایي،کنګل کوونکی ژمی او کنګل کړې پیسې د افغانانو لپاره یو ناوړه ترکیب دی،چې افغانان یې د مرګ له ګواښ سره مخ کړي دي.
هغه وایي، بیوزلۍ د افغانستان خلک د خپلو ماشومانو پلورلو ته اړ کړي او اړتیا ده،چې پر وړاندې یې نړۍ پر ګډه مبارزه وکړي.
ګوترس زیاته کړه:«کنګل کوونکی ژمی او کنګل شوې شتمني د افغانانو لپاره مرګونی ترکیب دی. موږ له نړیوالې ټولې غواړو،چې د افغانستان مرکزي بانک شتمني دې ازادې کړې،ترڅو دلته د اقتصادي او ټولنیز نظام د سقوط مخه ونیول شي.»
په ورته وخت کې ګوترس وايي، د افغانستان له نمایي نفوس ډېر خلک ژوند ژغورنکو بشري مرستو ته اړتیا لري.
هغه زیاتوي:« افغانستان کې خلک خپل ماشومان پلوري،ترڅو خپلې کورنۍ ته خواړه برابر کړي، روغتیايي مرکزونه له یخ کړیږي،خلک د خونو ګرمولو لپاره خپله شتمني سوځوي او له نیمایي زیات نفوس د ژوند ژغورنې مرستو ته اړتیا لري.»
ملګرو ملتونو ته د اسلامي امارت نوماند سهیل شاهین د ګوترس څرګندونو هرکلی کړی او زیاته کړې یې ده،چې هغه د افغانستان حقایق وړاندې کړي دي.
شاهین د ملګرو ملتونو له سرمنشي مننه کړې ده،چې په روان سخت ژمي کې یې د افغانستان خلکو وضیعت ته پام دی.
شاهین زیاتوي:« زه د افغانستان کنګل شویو شتمنیو د خلاصولو او بانکي سیسټم د بیا عادي کولو په تړاو د ملګرو ملتونو سرمنشي د څرګندونو هرکلی کوم. هغه د افغانستان واقیعتونه بیان کړي دي. هغه قوانین باید په داسې شرایطو کې وځنډول شي،چې د خلکو ژوند او اقتصاد د ژغورولو لپاره د پیسو د استعمال مخنیوی کوي.»
انتونیو ګوترس د هغو پنځه میلیارده ډالرو غوښتنې په تړاو وویل،چې دا لومړی ځل دی،چې ملګري ملتونه د یوه هېواد لپاره د دومره پیسو غوښتنه کوي.
هغه وایي، دا پیسې د دې ښکارندويي کوي،چې په افغانستان کې وضیعت څومره نازک دی.
