تاشقرغان تنګی داسې یو بازار و چې د شمال ځانګړې ډالۍ او د همدې سیمې تولیدات به په کې پلورل کېدل او نورو ولایتونو ته به وړل کېده، خو اوس له دې ځایه موټر چلوونکي ګړندي تېرېږي.
د شوې زلزلې له امله دا بازار وران او هټۍ وال يې له ګڼو مالي تاوانونو سره مخ شوي دي.
زیانمن شوي هټۍ وال وايي، پانګه يې له منځه تللې او له شتمنو او مرستندویه بنسټونو یاده برخه کې د لاسنیوي غوښتنه کوي.
د متین په نوم زیانمن شوی هټۍ وال وايي: « راشئ وګورئ، خپله به ووینئ چې موږ ته هېڅ نه هم نه دي راپاتې.»
زیانمن شوی هټیوال سمیع الله وايي: « زه له اسلامي امارت غوښتنه کوم چې زموږ لاسنیوی وکړي.»
په دې بازار کې تر زلزلې وړاندې لسګونه میلیونه پانګونه شوې وه، خو اوس مهال هېڅ هم نه شته او هټۍ وال زیاتوي چې اوس کورنۍ ته د یوې مړۍ ډوډۍ پیداکولو ته حیران دي.
زیانمن شوی هټیوال سمیع الله په دې اړه وايي: « زما دری دوکانونه بشپړ له منځه تللي، په دې کې مې ۴۰۰ زره افغانۍ پانګونه بنده کړې وه، خو زلزلې پرې دا غر را وغورځاوه او هرڅه یې له منځه یوړل.»
زیانمن شوی هټیوال متین وايي: « ما دلته وچه او تازه مېوه خرڅوله. له ۱۰۰ تر ۱۲۰ زرو تاوان را رسېدلی دی.»
په ورته مهال، ځایي مسوولینو شمشاد ته ویلي چې د تاشقرغان تنګي اړوند سیمه کې له ۵۰ زیاتې هټۍ په بشپړ ډول له منځه تللې دي. د دوی په خبره، له ځینو همکارو بنسټونو سره یې خبري کړي چې د هټۍ والو لاسنیوی وکړي.
د خلم ولسوال عبدالقادر حامد وايي: « هغه دوکانونه چې د تنګي په داخل کې وو، په بشپړه توګه ویجاړ شوي او توکي یې له منځه تللي. ۳۵ دوکانونه په بشپړه توګه ویجاړ شوي او ۵۲ نور دوکانونه په سطحي توګه ویجاړ شوي یا یې لږ توکي له منځه تللي.»
د سمنګان خلم ولسوالۍ اړوند تاشقرغان تنګی چې د افغانستان شمال او مرکز سربېره د منځنۍ اسيا او جنوبي اسيا ترمنځ د اقتصاد، سوداګرۍ، سيمه یيزي همکارۍ او ټولنیزو اړیکو مهمه نښلونکې لاره ده، تر زلزلې را وروسته د دې سیمې خلک د اوسني تنګي په ځای د ټونل جوړولو غوښتنه کوي.
