د سیاسي چارو یو شمېر کارپوهانو په باور،که څه هم اوس تعاملات موجود دي او په غیر رسمي ډول نړۍ په افغانستان کې ښکېل ده او د رسمیت نه پیژندلو کړکیچ به دومره جدي نه وي،ځکه د افغانستان سیاسي ثبات ته د سیمې اړتیا هم ده.
د سیاسي چارو کارپوه بلال فاطمي وايي:« موږ فکر نه کوو،چې حالت دومره خرابۍ خواته لاړ شي او په رسمیت یې ونه پیژني. ځکه اوس داسې ښکاري،چې مراودې له ټولو سره شته دی. کیدای شي په چین او روسیه کې هم دوی خپل غړي بدل کړي او په رسمیت پیژندل به پیل شي. حالات به بهترۍ لور ته ځکه ځي،چې دا حالت د هیچا پر ګټه نه دي.»
خو یو شمېر نور دا مني،چې د نړۍ او اسلامي امارت ترمنځ فعال تعامل موجود دی،خو د اړیکو دغه کچه له اوسنیو ستونزو د وتلو لپاره په اوږدمهال کې بسنه نه کوي.
کارپوهان وايي، نړیوال مشروعیت او رسمیت هغه وخت ممکن دی،چې د افغانانو ترمنځ کورنی تفاهم رامنځ ته شي.
د سیاسي چارو کارپوه صفت الله ساپی:« په اوږدمهال کې، په داخل کې یو افغاني جوړښت ته اړتیا لري،داسې یو بنسټ رامنځ ته کول،چې نړیوال په نهایت کې پوره مشروعیت ته منتج شي. دا هغه څه دي،چې نښې یې لا ښکاري اما په دې کې عملي اقدامات له نه دي شوي دي. په دغه برخه کې د حکومت لپاره په کار ده،چې د افغانانو ترمنځ داخلي تفاهم رامنځ ته کړي.»
اخوا پاکستاني چارواکو پر اسلامي امارات نیوکه کړې،چې له القاعده او نورو ترهګرو ډلو پر وړاندې د طالبانو نامشخص دریځ به پر اسلاميامارت د نړیوالو بې باوري زیاته کړي.
که څه هم د اسلامي امارت د لومړۍ او دویمې واکمنۍ ترمنځ د دوه لسیزو توپیر دی،خو تېر ځل هم اسلامي امارات تر پنځه کلونو پورې پرته له څو محدودو هېوادونو د نړیوالو له خوا په رسمیت نه و پیژندل شوی.
